Овқатдан кейин дарҳол чой ичиш зарарлими? Мутахассислар изоҳи

Чой дунёдаги энг фойдали ичимликлардан бири ҳисобланади. Бироқ у билан боғлиқ кўплаб нотўғри қарашлар мавжуд. Улардан бири чойни овқатдан кейин дарҳол истеъмол қилмасликдир. Овқатдан олдин ҳам ичмаслик керак, фақат узоқ вақтдан сўнггина чой ичиш мумкинлиги ҳақида фикрлар бор. Барча шубҳаларни бартараф қилиш учун Wday.ru нашри овқатланиш соҳасидаги мутахассислар фикрини бир жойда жамлади.

Одатда, шундай бўлади: тушлик ёки кечки овқатни кутаётганда, сизга биринчи навбатда чой, қаҳва, сув ва бошқа ичимликлар келтирилади. Асосий таомни кутар экансиз, чой ҳўплаб турасиз — бунинг нимаси ёмон? Улар гўёки овқатдан олдин чой ичмаслик кераклигини ёзишади, чунки у сўлак ҳосил қилади. Аксинча, агар чойдан сўнг дарҳол овқатлансангиз яхши бўлади, — дейди эндокринолог Алексей Калинчев. — Фақат тўлиқ овқатланишни чой билан алмаштирмаслик керак. Бу тарздаги очлик, албатта, эртами-кечми гастрит, ошқозон яраси ва панкреатитга олиб келади.

Овқатдан кейин чой ичиш фикрига келсак, чой ичишни овқатдан 1-3 соат кейинга қолдиришга ундайдиган барча мақолалар мутлақо бемаъниликдир. Овқатдан сўнг дарҳол чой ичса бўлаверади — бу зарар қилмайди. Айниқса, кўк чойни тавсия қиламан, у энг фойдали чой ҳисобланади. Қора эса қаҳва каби кераксиз тоник таъсирга эга бўлиши мумкин.

Шунингдек, халқаро стандартларга кўра, биз кунига тахминан 2 литр суюқлик ичишимиз керак ва кўк чой унга тенглаштирилади. Хўш, агар биз овқатдан олдин ва кейин чой ичишдан маҳрум бўлсак, бу меъёрни қачон бажарамиз?

Овқатдан кейин чойнинг хавфлилиги ҳақидаги баёнот фойдасига асосий далил шундаки, ичимликлар меъда ширасини суюлтириши ва овқат ҳазм қилиш жараёнига халақит бериши мумкин. Бироқ бу назарияни тасдиқловчи жиддий тадқиқотлар йўқ, — дейди нутрициолог Марина Бессонова. — Умуман олганда, меъда ширасининг кислоталилигини ўзгартириш осон эмас ва бу жуда катта ҳажмдаги суюқликни талаб қилади.

Яна бир масала борки, аччиқ чой ёки қаҳва, маълум моддаларнинг таркиби туфайли озиқ-овқатдан муҳим микро ва макро элементларнинг сўрилишига халақит бериши мумкин. Мисол учун аччиқ қора чой таркибидаги танинлар темирнинг сўрилишини бузади.

Шунинг учун тоза сувга, шунингдек, ўсимлик ёки кўк чойга устунлик бериш тавсия этилади.