Choy dunyodagi eng foydali ichimliklardan biri hisoblanadi. Biroq u bilan bog‘liq ko‘plab noto‘g‘ri qarashlar mavjud. Ulardan biri choyni ovqatdan keyin darhol iste’mol qilmaslikdir. Ovqatdan oldin ham ichmaslik kerak, faqat uzoq vaqtdan so‘nggina choy ichish mumkinligi haqida fikrlar bor. Barcha shubhalarni bartaraf qilish uchun Wday.ru nashri ovqatlanish sohasidagi mutaxassislar fikrini bir joyda jamladi.
Odatda, shunday bo‘ladi: tushlik yoki kechki ovqatni kutayotganda, sizga birinchi navbatda choy, qahva, suv va boshqa ichimliklar keltiriladi. Asosiy taomni kutar ekansiz, choy ho‘plab turasiz — buning nimasi yomon? Ular go‘yoki ovqatdan oldin choy ichmaslik kerakligini yozishadi, chunki u so‘lak hosil qiladi. Aksincha, agar choydan so‘ng darhol ovqatlansangiz yaxshi bo‘ladi, — deydi endokrinolog Aleksey Kalinchev. — Faqat to‘liq ovqatlanishni choy bilan almashtirmaslik kerak. Bu tarzdagi ochlik, albatta, ertami-kechmi gastrit, oshqozon yarasi va pankreatitga olib keladi.
Ovqatdan keyin choy ichish fikriga kelsak, choy ichishni ovqatdan 1-3 soat keyinga qoldirishga undaydigan barcha maqolalar mutlaqo bema’nilikdir. Ovqatdan so‘ng darhol choy ichsa bo‘laveradi — bu zarar qilmaydi. Ayniqsa, ko‘k choyni tavsiya qilaman, u eng foydali choy hisoblanadi. Qora esa qahva kabi keraksiz tonik ta’sirga ega bo‘lishi mumkin.
Shuningdek, xalqaro standartlarga ko‘ra, biz kuniga taxminan 2 litr suyuqlik ichishimiz kerak va ko‘k choy unga tenglashtiriladi. Xo‘sh, agar biz ovqatdan oldin va keyin choy ichishdan mahrum bo‘lsak, bu me’yorni qachon bajaramiz?
Ovqatdan keyin choyning xavfliligi haqidagi bayonot foydasiga asosiy dalil shundaki, ichimliklar me’da shirasini suyultirishi va ovqat hazm qilish jarayoniga xalaqit berishi mumkin. Biroq bu nazariyani tasdiqlovchi jiddiy tadqiqotlar yo‘q, — deydi nutritsiolog Marina Bessonova. — Umuman olganda, me’da shirasining kislotaliligini o‘zgartirish oson emas va bu juda katta hajmdagi suyuqlikni talab qiladi.
Yana bir masala borki, achchiq choy yoki qahva, ma’lum moddalarning tarkibi tufayli oziq-ovqatdan muhim mikro va makro elementlarning so‘rilishiga xalaqit berishi mumkin. Misol uchun achchiq qora choy tarkibidagi taninlar temirning so‘rilishini buzadi.
Shuning uchun toza suvga, shuningdek, o‘simlik yoki ko‘k choyga ustunlik berish tavsiya etiladi.