Истеъмолга яроқсиз бўлган, инсон саломатлигига жиддий хавф солувчи гўшт маҳсулоти савдосининг олди олинди, деб хабар бермоқда Сурхондарё вилояти ИИБ матбуот хизмати.
Маълум қилинишича, 26 июль куни Шўрчи—Тошкент йўналишида ҳаракатланиб келаётган О.З. (исм шарифлар ўзгартирилган) бошқарувида бўлган Cobalt тўхтатилиб, текширилганда юкхонасида 170 кило ҳеч қандай ветеринария ҳужжатисиз олиб кетилаётган мол гўшти борлиги аниқланган.
Унинг истеъмолга яроқли ёки яроқсиз эканлигини текшириш учун Бойсун туман ҳайвонлар касалликлари ташхиси ва озиқ- овқат маҳсулотлари хавфсизлиги давлат маркази лабораториясига топширилганида, истеъмолга яроқсиз экани аниқланган. Бу гўштларни сотиб, пул орттиришни мақсад қилган шахсга тегишли тартибда қонуний чора кўрилган.
Ички ишлар органлари ҳамда тегишли давлат ташкилот ва идоралари билан ҳамкорликда бу каби истеъмолга яроқсиз инсон саломатлигига жиддий хавф солувчи озиқ-овқат ва ноозиқ-овқат маҳсулотларини аниқлаш борасидаги рейд тадбирлари давом этмоқда.
Изоҳ (0)