Внуково аэропортида Ўзбекистон фуқаросининг ички кийимидан олмослар топилди (фото)

Внуково божхона бошқармаси ходимлари Бирлашган Араб Амирликларидан келган Ўзбекистон фуқаросининг ички кийимидан олмосларни топди. Бу ҳақда Федерал божхона хизматига таяниб, “Российская Газета” хабар берди. 

Топилган 60 дан ортиқ қимматбаҳо тошларнинг бозор қиймати 5 миллион рублдан (тахминан 56 минг доллар) ошади. Инспекторлар аэропортнинг “яшил” йўлагида 39 ёшли ўзбекистонлик эркакни тўхтатган. Унинг юкини сканерлаш чоғида божхоначилар кўринишидан электрон қурилмаларга ўхшаш нарсаларни пайқаган.

“Божхона текшируви чамадон ичида Apple, Samsung ва Sony компанияларининг турли маҳсулотлари солинган 13 та қути, шунингдек, қимматбаҳо тошлар учун уларнинг келиб чиқиши ва сифат хусусиятларини тасдиқловчи 40 та GIA ва IGI сертификатлари борлигини кўрсатди”, — дейилади хабарда.

Божхоначиларнинг назоратдан яширилган товарларни ихтиёрий равишда бериш таклифига эркак бундай нарса йўқлигини айтган. Бироқ шахсий кўрик натижасида Ўзбекистон фуқаросининг ички кийимида олмослар топилган. Шаффоф ва кўк рангдаги жами 62 та катта тош аниқланган. 

Таъкидланишича, заргарлик буюмлари учта полиэтилен пакетга солиниб, скотч билан ўралган. 

“Текширувдан сўнг эркак БААнинг йирик авиакомпанияларидан бирининг ходими эканини тушунтирган. У Москвага қариндошлариникига учиб келган”, — дейди божхона бошқармаси.

Ўзбекистон фуқароси божхона қоидалари билан қисман таниш эканини айтган. У совға сифатида олиб келгани айтилган товарларнинг нархи,17 минг АҚШ долларидан ошмаган. Экспертиза мусодара қилинган барча қимматбаҳо тошлар олмос эканини тасдиқлаган.

Мазкур ҳолат юзасидан Россия Жиноят кодексининг 226,1-моддаси 1-қисми “стратегик аҳамиятга эга товарлар ва ресурслар контрабандаси” бўйича жиноий иш қўзғатилган. Ушбу модда 7 йилгача озодликдан маҳрум қилишни назарда тутади.

Шунингдек, у Россия Жиноят кодексининг 194-моддаси “божхона тўловларини тўлашдан бўйин товлаганлик” бўйича ҳам жазога тортилиши мумкин. Агар экспертиза унинг багажида олиб юрган гаджетларини “шахсий фойдаланиш учун мўлжалланмаган янги товарлар” деб тан олса, бу амалга ошади.

“Суд қарорига кўра, Ўзбекистон фуқаросига нисбатан қамоққа олиш тарзидаги эҳтиёт чораси танланди. Тергов давом этмоқда”, — дея хулоса қилди Федерал божхона хизмати.