2035 йилда Ойда илк бор рақобатбардош футбол учрашуви ўтказилиши мумкин.
Муҳандислик ва технология институти (Буюк Британия) вакили бўлган муҳандислар, технологлар ва бошқа олимлар ой футболи учун дастлабки қоидалар тўпламини ишлаб чиқди.
Лойиҳанинг асосий мақсадларидан бири — ёшларни ўзига жалб этиш ва илҳомлантириш, уларга фан, технология, муҳандислик ва математика соҳаларида фаолият қандай бўлишини кўрсатишдан иборат.
Ойдаги ўйин учун одатдагидан бир ярим баравар каттароқ бўлган қора-оқ тўпдан фойдаланиш таклиф этилмоқда. У аэрогелнинг янги авлодидан тайёрланиши лозим, бу ўзига хос самара беради. У тўп ичида ҳаво бўлмасдан, ерда сакраб туришига сабаб бўлади.
Либослар сифатида эса тизза ва тирсак ёстиқчалари ўрнатилган ҳаво ўтказмайдиган костюм чиқарилади. У совутиш ва иситиш тизимига ва фланел қопламасига эга бўлади. Шлемлар эса ўйинчилар ва мураббийлар ўртасида мулоқот қилиш, ҳакамлар қарорлари ва костюмнинг ҳолатини кўрсатиш қобилиятини таъминлайди. Унинг кўриш бурчаги 180-270 даража бўлади.
Ой футболи контактсиз спорт тури бўлиб, унда тўпга эгалиш қилиш учун кураш эмас, балки тўхтатиб қолиш керак бўлади. Ҳар бир жамоада беш нафардан футболчи бўлиб, уларга нафақат тўқнашувлар, балки жиҳозларга зарар етказмаслик учун бош билан ҳам ўйнаш тақиқланади.
Текис майдон ҳосил қилиш учун лазер технологияси қўлланилади — сиртни қобиқ билан қоплаш, бунинг натижасида бир хил бўлмаган элементлар эриб, битта қатламга айланади. Ўйин майдончаси узунлиги 32 метр, эни 25 метрни ташкил қилади. Дарвозалар эса катталаштирилади — энига деярли 11 метр ва баландлиги деярли 3 метр бўлади.
Ҳакамлар голограмма кўринишида бўлади. Улар ўйиннинг станциядан туриб бошқаради.
Учрашув тўртта ўн дақиқалик бўлимларга бўлинади, улар орасида техник хизмат кўрсатиш учун йигирма дақиқалик танаффуслар берилади.
Муҳандислик ва технология институти 4 ёшдан 13 ёшгача бўлган британиялик болалар ўртасида биринчи ўзга сайёралик “Moon Utd” жамоаси учун либосларни лойиҳалаш бўйича танлов эълон қилди.
Изоҳ (0)