Тошкент вилояти Нурафшон шаҳрида 3 киши канализацияда заҳарланиб вафот этди. Бу ҳақда Бош прокуратура матбуот котиби Ҳаёт Шамсутдинов “Дарё”га маълум қилди.
Қайд этилишича, 20 июль куни “Тошкент коммунал қурилиш сервис” МЧЖ ишчиси — 57 ёшли Қ.А. шаҳарнинг “Тўйтепа” МФЙда жойлашган сув оқова тармоғи (канализация) қудуғига тушиб, тозалаш ишларини олиб бораётган бўлган. Шу вақтда қудуқ ичидан чиққан заҳарли газ аралашмасидан бўғилиб, ҳушидан кетган.
Ўша ерда бўлган С.М. (23 ёш), Е.К. (55 ёш) ва Ф.Ш. (27 ёш) қудуқ ичига ёрдам бериш мақсадида тушган, аммо улар ҳам ҳушини йўқотган. Оқибатда Қ.А., С.М. ва Е.К. ҳодиса жойида вафот этган. Ф.Ш. эса ҳушсиз ҳолатда шаҳар марказий шифохонасининг жонлантириш бўлимига ётқизилган.
Суд-тиббий экспертизасининг дастлабки маълумотига кўра, фуқароларнинг ўлимига водород сулфиддан ўткир заҳарланиш, ўткир нафас, юрак-қон томир етишмовчилиги кабилар сабаб бўлган.
Шаҳар ИИБ ҳузуридаги тергов бўлинмаси томонидан ҳолат юзасидан Жиноят кодексининг 257-моддаси 2-қисми “б” банди (меҳнатни муҳофаза қилиш қоидаларини бузиш: бошқа оғир оқибатлар келиб чиқишига сабаб бўлса) билан жиноят иши қўзғатилиб, дастлабки тергов ҳаракатлари олиб борилмоқда.
Апрель охирларида Сирдарё вилояти Сардоба туманида 27 апрель куни 3 киши ҳожатхонада заҳарланиб вафот этганди. Уй эгаси телефони чуқурга тушиб кетгани сабабли отаси ва укасини ёрдамга чақирган. Улар ҳожатхонага тушган вақтда номаълум этиологияли заҳарланишдан вафот этган.
Изоҳ (0)