Самарқанд, Жиззах ва Фарғона вилоятларида пул эвазига ишга жойлаштириб қўйиш билан боғлиқ фирибгарлик ҳолатлари фош этилди, деб хабар беради Бош прокуратура ҳузуридаги департамент.
Қайд этилишича, департамент ҳамда Миллий гвардия Самарқанд вилояти бошқармалари томонидан ИИБ ходимлари билан ҳамкорликда тезкор тадбир ўтказилган. Тадбирда И.Н. исмли шахс фуқаро Ж.Ш.ни гўёки юқори лавозимда ишловчи танишлари ёрдамида 3 минг доллар эвазига Миллий гвардия тизимига ишга жойлаштириб қўйишини айтиб, олдиндан 1,5 минг долларни олган вақтида ашёвий далиллар билан ушланган.
Шу каби, департамент ҳамда ДХХнинг Жиззах вилояти бошқармалари томонидан ўтказилган тезкор тадбирда вилоят кўп тармоқли тиббиёт маркази ҳамшираси М.Н. фуқаро Х.М.ни танишлари ёрдамида ушбу марказга ишга жойлаштириб қўйиш эвазига 900 АҚШ доллари олган вақтида қўлга тушган.
Худди шундай, департамент ҳамда ДХХнинг Жиззах вилояти бошқармалари томонидан ўтказилган тезкор тадбирда вилоят соғлиқни сақлаш бошқармаси шўба бошлиғи Ж.А. фуқаро М.К.ни шаҳардаги тиббиёт бирлашмаларидан бирига ишга жойлаштириб қўйиш эвазига 800 долларни олган вақтида ашёвий далиллар билан ушланган.
Департаментнинг Қўштепа туман бўлими томонидан ўтказилган терговга қадар текширувда туман Тиббиёт бирлашмасига қарашли оилавий поликлиника собиқ бош ҳамшираси С.К. фуқаро Ш.А.нинг ишончига кириб, уни бирлашманинг патронаж хизматига ишга жойлаштириб қўйишни ваъда қилгани аниқланган. У 750 АҚШ долларини фирибгарлик йўли билан қўлга киритиб, ушбу пуллар ҳисобидан 500 минг сўмни қайтаргани процессуал тартибда расмийлаштирилган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Ноқонуний ишга киритиш ҳолатлари
Бундан олдин Самарқандда Миллий гвардияга ишга киритиб қўйишни ваъда қилиб, 27 минг АҚШ долларини ўзлаштирган фуқарога жиноят иши қўзғатилгани, Бухорода фуқарони Миллий гвардияга ишга қўйиш эвазига 2 000 доллар олган шахслар ушлангани, Самарқандда ҳарбий олийгоҳлар ва Темурбеклар мактабига ўқишга киритишини айтиб, фуқаролардан қарийб 10 500 доллар пул олган аёл қўлга олингани тўғрисида хабар берилганди.
Изоҳ (0)