O‘zbekistonning Qohiradagi elchixonasida Misrning ACDIMA Group xolding kompaniyasi prezidenti Ulfat G‘urab bilan uchrashuv o‘tkazildi, deb xabar bermoqda “Dunyo” AA.
O‘zbekistonning Qohiradagi elchixonasi ma’lumotiga ko‘ra, ushbu kompaniya vakillari mart oyidan buyon O‘zbekistonga bir necha bor safar uyushtirgan holda qo‘shma loyihalar ishlab chiqish va amalga oshirish, ushbu loyihalarga Misr sarmoyalarini kiritish bo‘yicha muzokaralar olib bordi.
ACDIMA Group kompaniyasi dastlabki bosqichda Misrda ishlab chiqarilgan dori vositalarini O‘zbekiston bozoriga olib kirishni, yaqin kelajakda esa dori-darmonlarni mahalliylashtirish va ishlab chiqarishni yo‘lga qo‘yish, ularni qo‘shni davlatlarga eksport qilish, ushbu jarayonlarga zamonaviy texnologiyalarni jalb qilish hamda mutaxassislar tayyorlashni mo‘ljallamoqda.
Amaliy safar natijadorligini oshirish va O‘zbekiston tomoni bilan aniq kelishuvlarga erishish maqsadida delegatsiyaga ACDIMA Group kompaniyasi tarkibidagi turli tuzilmalar rahbarlari kiritilgan.
Ma’lum qilinishicha, ACDIMA Group kompaniyasi 1976-yilda tashkil topgan. Farmatsevtika mahsulotlari va dori-darmonlar ishlab chiqaruvchi bir necha kompaniyalarni o‘z ichiga olgan Misrning yetakchi yirik xoldinglaridan biri hisoblanadi. Misrda 18 ta ishlab chiqarish korxonasiga ega bo‘lgan ushbu kompaniya dunyoning 50 dan ziyod mamlakatida biznes yuritish ishlarini yo‘lga qo‘ygan.
Izoh (0)