Ўтган ярим йил давомида 171 та тадбиркорлик субъектида 1,2 триллион сўмлик солиқ базаси яширилгани аниқланган. Бунинг учун уларга жами 240,1 миллиард сўм миқдорида жарималар қўлланилган.
Солиқ органлари томонидан 2023 йил январь—июнь ойларида солиқларни тўламаслик хавфи юқори бўлган 533 та тадбиркорлик субъектида солиқ аудити ўтказилди. Текширув давомида аниқланган солиқ хавфи суммаси 255,5 миллиард сўмни ташкил этган. Солиқ аудитида тасдиқланган сумма эса 969 миллиард сўм бўлган.
Аниқланган сумма соҳалар кесимида:
- савдо ва умумий овқатланиш – 331 миллиард сўм (34,1 фоиз);
- ишлаб чиқариш – 235,6 миллиард сўм (24,3 фоиз);
- қурилиш соҳасида – 133,2 миллиард сўм (13,8 фоиз);
- хизмат кўрсатиш – 89 миллиард (9,2 фоиз);
- қишлоқ хўжалиги – 5,5 миллиард сўм (0,6 фоиз);
- транспорт – 4,9 миллиард сўм (0,5 фоиз);
- бошқа соҳалар– 169,8 миллиард сўм (17,5 фоиз).
Ўтказилган солиқ аудитларида 30 та солиқ тўловчида 171 миллиард сўмлик солиқ базаси яширилган, 124 та субъектда 750,3 миллиард сўмлик сотилган товарлар суммаси кўрсатилмаган. Шунингдек, 46 та субъектда 406,8 миллиард сўмлик товарлар инвентаризация пайтида омбор ёки реализация жойида мавжуд бўлмаган. Қолган 16 та субъектда 43,3 миллиард сўмлик кирим қилинмаган товарлар сақланган ва (ёки) реализация қилинган.
“Бугунги кунда аниқланган солиқ суммаларидан тўлов муддати келган 518,9 миллиард сўмнинг 398,3 миллиард сўми (77 фоиз) тўлаб берилган” — дейилади Солиқ қўмитаси хабарида.
Маълумот учун, 2022 йилда солиқ органлари 433 та тадбиркорлик субъектида аудит ўтказиб, 3,2 триллион сўмлик солиқ базаси яширилганини аниқлаган ва айбдорларга 649 миллиард сўмлик жарималар қўлланган.
Изоҳ (0)