Навоийда фуқаролар Ўзбекистон Қизил китобига киритилган икки дона жайронни отгани тўғрисида хабар берилганди. Бош прокуратуранинг маълум қилишича, ҳолат юзасидан жиноят иши қўзғатилган.
9 июль куни Навоий вилоятида ўтказилган назорат рейд тадбири давомида Навбаҳор тумани ҳудудидан ўтувчи А-379 йўлининг 3–4-километрида фуқаро Қ.Ш. бошқарувидаги Нива тўхтатилиб текширилганда машина юкхонасида 2 дона отилган Қизил китобга киритилган жайрон (кийик) борлиги аниқланган.
Ҳолат юзасидан текширув ва суриштирув ишлари олиб борилганда ушбу жайронлар Самарқанд вилояти Нарпай тумани “Болтали” қишлоғида яшовчи фуқароларга тегишли ов қуроллари ёрдамида ноқонуний равишда овлангани маълум бўлган.
Бош прокуратурага кўра, жайронлар броконьерлар томонидан ваҳшийларча отиб ўлдирилганлиги бўйича Навоий вилояти прокуратураси томонидан Жиноят кодексининг 202-моддаси (ҳайвонот ёки ўсимлик дунёсидан фойдаланиш тартибини бузиш) билан жиноят иши қўзғатилган.
“Мазкур жиноят иши тегишлилиги бўйича вилоят ИИБга юборилди. Жиноят иши тергови устидан прокурор назорати ўрнатилган”, — дейилади хабарда.
Браконьерлик ҳолатлари
Май бошларида “Сурхон” қўриқхонасидан Бухоро тоғ қўйининг боласини ноқонуний олиб кетган браконьерлар ушлангани тўғрисида хабар берилганди. Июнда эса Қорақалпоғистонда браконьер Қизил китобга киритилган буғуни овлаб, қочиб кетишга уринган эди.
Изоҳ (0)