Қашқадарё вилоятининг Шаҳрисабз шаҳрида яшовчи 26 ёшли аёл турмуш ўртоғидан мунтазам равишда калтак еб келгани, Россияда ишловчи онаси ва акасининг олдига кетаётганида эри томонидан ушлаб олиниб, оёқ-қўли боғлаб қўйилгани хабар қилинганди. Қашқадарё вилоят ИИБ ахборот хизматининг маълум қилишича, ҳолат юзасидан терговга қадар текширув ҳаракатлари олиб борилмоқда.
Қайд этилишича, мазкур ҳолат 2021 йилнинг май ойида содир бўлган.
“2018 йил қонуний никоҳдан ўтиб, бирга яшаб келаётган 1992 йилда туғилган фуқаро Ш.М. ва 1997 йилда туғилган фуқаро Й.С.лар ўртасида ўзаро оилавий келишмовчиликлар содир бўлган. Аёл юқоридаги ҳолат бўйича илгари ички ишлар органларига мурожаат этмаган”, — дейилади ИИБ ахборотида.
Қўшимча қилинишича, эр-хотин Ш.М. ва Й.С. 2022 йил июнь ойида ҳам ўзаро жанжаллашгани боис, мазкур воқеа Жиноят ишлари бўйича Шаҳрисабз туман судида кўриб чиқилган.
“Суднинг 2022 йил 26 июль кунидаги қарорига асосан эркак Ш.М. Маъмурий жавобгарлик тўғрисидаги кодекснинг 41-моддаси ва 52-моддаси 2-қисмида назарда тутилган маъмурий ҳуқуқбузарликларни содир этган деб топилиб, унга жарима жазоси қўлланилган”, — дейди масъуллар.
Ҳозирги кунда тарқалган видео юзасидан Шаҳрисабз шаҳар ИИБ ҳузуридаги Тергов бўлинмаси томонидан терговга қадар суриштирув ҳаракатлари олиб борилмоқда.
Изоҳ (0)