“Хива — 2024 йилда ислом дунёсининг туризм пойтахти” халқаро тадбирига тайёргарлик кўриш ва уни ўтказиш чора-тадбирлари тўғрисидаги президент қарори қабул қилинди. Бу ҳақда Telegram’даги “Ҳуқуқий ахборот” канали хабар берди.
Қарорга кўра, 2024 йил Хивада:
- мартда “Хива – 2024 йилда ислом дунёсининг туризм пойтахти” халқаро тадбири;
- май ойида Ислом ҳамкорлик ташкилотига аъзо давлатлар туризм вазирларининг XII сессияси ўтказилади.
2023–2024 йилларда қуйидаги тадбирлар ташкил этилади:
- Taste of Uzbekistan Festival шиори остида гастрономик фестиваль;
- Паҳлавон Маҳмуд хотирасига бағишланган Strongmen халқаро баҳодирлар мусобақаси;
- “Халқаро зиёрат туризми ҳафталиги” доирасидаги тадбирлар.
Шунингдек, халқаро тадбир логотипи ҳамда Хива шаҳри ҳақида ўзбек, рус, инглиз, араб ва француз тилларида қўлланма ишлаб чиқилади.
2023 йил октябрда Ислом ҳамкорлик ташкилотига аъзо давлатларнинг туристик ташкилотлари, ОАВ вакиллари, блогерларни жалб қилган ҳолда Хоразм вилояти бўйлаб инфотур ташкил этилади.
Эслатиб ўтамиз, 2019 йилда “Ичан қалъа”нинг “Кўҳна Арк” майдонида Паҳлавон Маҳмуд номидаги I халқаро баҳодирлар ўйинлари ўтказилганди. Халқаро номланиши Strongmen деб аталувчи ушбу мусобақа Ҳиндистон, Эрон, Туркия, Покистон, Латвия, Россия каби 20 мамлакатдан жаҳоннинг энг кучли полвонлари иштирок этган. 2022 йилда эса Хива шаҳрида “Pakhlavon Makhmud — Strongmen Games” II Халқаро турнири бўлиб ўтиши айтилган эди.
Изоҳ (0)