Инвестициялар, саноат ва савдо вазири ўринбосари Сарвар Хамидов бошчилигидаги вазирлик ва идоралар раҳбарларидан иборат ишчи гуруҳ Қорақалпоғистонда халқаро молия институтлари ва грантлар ҳисобидан қурилаётган лойиҳаларни амалга оширишнинг бугунги ҳолатини ўрганди, деб хабар бермоқда вазирлик матбуот хизмати.
Сафар давомида гуруҳ Осиё тараққиёт банки иштирокида қиймати 274,2 миллион доллар бўлган А-380 Ғузор—Бухоро—Нукус—Бейнеу автомобиль йўлининг 964–1204-километр (240 километр) қисмини реконструкция қилиш” лойиҳасининг амалга оширилиши билан танишди.
Лойиҳа доирасида Қўнғирот туманида 240 километр узунликдаги икки тасмали цемент-бетон қопламали йўл қурилади. Айни пайтда 190 километр йўл пойи, 155 километр шағал-қум аралашмаси, 75 километр цемент-бетон қоплама ётқизилди. Ўрганишлар давомида қурилиш материаллари етказиб бериш учун вагон ва тепловозлар ажратишда муаммолар борлиги аниқланди. Кўтарилган масалаларни ҳал этиш чоралари кўрилмоқда.
Ҳудудда “Ўзбекистоннинг ғарбий қисмида ичимлик суви таъминоти тизимларини ривожлантириш” лойиҳаси ҳам амалга оширилмоқда. ОТБ томонидан 145 миллион доллар миқдорида кредит ажратилди. 1280 километр сув тармоғи, суткалик қуввати 300 минг кубометрга тенг 3 та сув тозалаш иншооти, 24 та сув тақсимлаш иншооти ва 45 та сув омбори қурилиб, 320 мингдан ортиқ аҳоли истиқомат қилаётган Амударё, Мўйноқ, Нукус, Беруний, Қораўзак ва Қўнғирот туманларидаги 84 та маҳалла фуқаролар йиғинида ичимлик суви таъминотини яхшилашга имкон беради.
Йўналиш бўйича навбатдаги манзил — “Жанубий Қорақалпоғистонда сув ресурсларини бошқаришни яхшилаш” лойиҳаси. Унинг доирасида Беруний, Тўрткўл, Элликқалла туманларидаги 100 минг гектар суғориладиган ерларда сув ресурсларини бошқариш яхшиланади. Лойиҳани амалга ошириш учун Жаҳон банкининг 214,8 миллион доллар миқдоридаги кредити ажратилди. Режалаштирилган 20 та қурилиш ишлари пакетидан 9 таси бажарилди, 11 таси амалга оширилмоқда.
Шунингдек, Тўрткўл туманидаги “Бўстон каналини (Шарқий қисми) қайта тиклаш” лойиҳаси бўйича олиб борилаётган ишлар ўрганилиб, SCADA тизимини жорий этишни жадаллаштириш юзасидан тегишли кўрсатмалар берилди.
Ишчи гуруҳ аъзолари “Шайх Халифа номидаги “Оналар ва болалар” шифохонасини ташкил этиш” лойиҳаси қурилиш майдончасида ҳам бўлди. Лойиҳани амалга ошириш учун Соғлиқни сақлаш вазирлигига ажратилган грант маблағларининг умумий миқдори 27 миллион долларни ташкил этади.
Вазирлик хабарида айтилишича, ўрганиш давомида лойиҳа ташаббускорлари ва пудратчилар билан суҳбатлар ўтказилди, улар қурилиш жараёнида юзага келаётган масалалар билан ўртоқлашдилар. Жойлардаги масъул раҳбарларга юзага келаётган муаммоларни ҳал этиш, лойиҳаларни ўз вақтида фойдаланишга топшириш мақсадида идоралараро тизимли ҳамкорликни янада фаоллаштириш бўйича аниқ топшириқлар берилди.
Изоҳ (0)