Самарқанддаги Регистон ансамбли ва Шоҳи Зинда мажмуаси “Туристик диққатга сазовор объектлар бутунжаҳон рўйхати”га киритилди. Бу ҳақда Самарқанд вилояти Маданият ва туризм бошқармаси матбуот хизмати хабар берди.
Маълум қилинишича, 10 июль куни Регистон ансамблининг Улуғбек мадрасасида бу ҳақда тегишли сертификатни топшириш маросими бўлиб ўтди. Маросимда Евросиё иқтисодий ҳамкорлик ташкилоти Бош котиби Владимир Пискурев ҳамда Самарқанд вилояти ҳокими ўринбосари Рустам Қобилов иштирок этди.
2017 йил 7 ноябрь куни Туркиянинг Анталия шаҳрида бўлиб ўтган Евросиё Маданият, фан ва таълим кенгашининг иккинчи сессиясида “Жамиятлар, халқлар ва миллатларнинг барқарор ривожланиши учун туристик диққатга сазовор жойларни рағбатлантириш тўғрисида”ги Конвенция қабул қилинган.
Конвенция ни амалга ошириш доирасида Туризмнинг жозибадорлиги ва туризмни барқарор ривожлантириш бўйича халқаро қўмита тузилган. Халқаро қўмита фаолиятининг асосий масалаларидан бири туристик диққатга сазовор жойларни оммалаштириш, жамиятлар, халқлар ва миллатларнинг барқарор ривожланиши манфаатлари йўлида туристик ҳудудларни тарғиб қилишдан иборат.
Муайян объектни махсус туристик диққатга сазовор жойларнинг Жаҳон рўйхатига киритиш тўғрисидаги қарор Туризмни барқарор ривожлантириш бўйича халқаро қўмита сессияси томонидан овоз бериш йўли билан қабул қилинади.
Бугунги кунга қадар Ўзбекистоннинг 4 та тарихий диққатга сазовор жойлари ушбу рўйхатга киритилган.
Изоҳ (0)