Ўзбекистонда қуёш фотоэлектр станцияларини қуриш ва бошқариш лойиҳаларини амалга ошириш доирасида БААнинг Masdar компанияси томонидан халқаро молия институтларининг қарийб 396 миллион доллар миқдорида маблағлари жалб этилади. Бу ҳақда Энергетика вазирлиги матбуот хизмати хабар берди.
Қайд этилишича, Сурхондарё (Шеробод), Самарқанд (Каттақўрғон) ва Жиззах (Ғаллаорол) вилоятларида 3 та йирик қуёш фотоэлектр станциясини қуриш ва бошқариш учун Masdar компанияси ЕТТБ билан 127 миллион доллар, ОТБ билан 102 миллион доллар ва уларнинг ҳамкор банклари билан 167 миллион доллар миқдорида шартномалар имзолаган.
“Ушбу қуёш фотоэлектр станциялари умумий 897 МВт қувватига эга бўлади ва йилига 2 миллиард кВт/соат электр энергиясини ишлаб чиқариш орқали минтақадаги энг йирик қуёш энергияси лойиҳасига айланади”, — дейилади хабарда.
Самарқанд (Каттақўрғон) ва Жиззах (Ғаллаорол) вилоятларидаги лойиҳаларнинг дастлабки қувватлари жорий йилнинг декабрь ойида ишга туширилиши белгиланган.
Қуёш фотоэлектр станцияларининг қурилиши
Ўзбекистонда 2021 йилнинг май ойида Самарқанд вилоятининг Каттақўрғон тумани ва Жиззах вилоятининг Ғаллаорол туманида ҳар бири 220 МВт қувватга эга иккита янги қуёш электр станциясини давлат-хусусий шериклик доирасида қуриш бўйича тендер ғолиби эълон қилинганди. БААнинг қайта тикланадиган энергия соҳасидаги Masdar компанияси мамлакатда ва Марказий Осиё минтақасида электр энергияси ишлаб чиқаришга энг паст тарифларини таклиф қилган.
Самарқанд ва Жиззах вилоятларидаги қуёш электростанциялари йилига 1,1 миллиард киловатт-соатгача қайта тикланадиган электр энергияси ишлаб чиқариш имкониятига эга бўлади. Уларнинг ишлаши туфайли йилига ўртача 110 минг тонна ёки уларнинг бутун хизмат даври давомида жами 3,4 миллион тонна карбонат ангидрид эмиссиясининг олди олинади.
Ушбу лойиҳа “Қуёш энергетикасини кенгайтириш” дастури кўмагида амалга оширилмоқда. Унинг доирасида аввалроқ IFC тендер ўтказиш бўйича маслаҳат хизматларини кўрсатган, Жаҳон банки эса станциялар томонидан ишлаб чиқарилган электр энергиясини сотиб олиш бўйича жами 12 миллион АҚШ долларигача бўлган (ҳар бири учун 6 миллион АҚШ долларидан) мажбуриятларни бажариши учун банк кафолатларини тақдим этади.
Қуёш электростанцияларини ишга тушириш учун Masdar лойиҳа компанияларига ўз капиталидан 193 миллион доллар инвестиция киритади. Masdar, шунингдек, Осиё тараққиёт банки, Европа тикланиш ва тараққиёт банки, Европа инвестиция банки ҳамда Осиё инфратузилма инвестициялари банки томонидан 216 миллион доллар қарз маблағларини жалб қилади.
Изоҳ (0)