АҚШнинг Вашингтон шаҳрида содир бўлган отишмада тўққиз киши, жумладан, икки нафар вояга етмаган бола жароҳатланди, деб хабар берди маҳаллий полиция Twitter’даги саҳифасида.
Маҳаллий вақт билан соат 01:00 атрофида полицияга отишма ҳақида хабар келди — воқеа жойига етиб келган ҳуқуқ-тартибот идоралари ходимлари бир неча киши ўқдан жароҳат олганини аниқлади.
“Барча жабрланганлар ҳаёти учун хавфли бўлмаган жароҳатлар олган. Бизда жами тўққиз нафар жабрланувчи бор. Икки нафари вояга етмаганлар, бири тўққиз ёшда, иккинчиси эса ўн етти ёшда”, — дейди Колумбия округининг полиция бошлиғи ёрдамчиси Лесли Парсонс видеомурожаатда.
Унга кўра, ҳужумчилар кўчада АҚШ Мустақиллик кунини нишонлаётган маҳаллий аҳолига қарата ўт очган. Қора рангли автомобиль қидирувга берилган.
Аввалроқ оммавий ахборот воситалари Техаснинг Форт-Уэрт шаҳрида, камида уч киши ҳалок бўлган ва саккиз киши яралангани ҳақида хабар берган эди. Ўтган ҳафта охирида Балтимордаги отишмада камида 29 киши яраланган эди.
Изоҳ (0)