Жанубий Кореяда EveR-6 Android роботи оркестр дирижёри сифатида муваффақиятли дебют қилди, деб хабар бермоқда “Правила жизни” нашри.
Концерт 30 июнь, жума куни кечқурун Сеулда бўлиб ўтди. Робот Корея миллий оркестрининг маҳаллий халқ чолғу асбобларини чалаётган 60 дан ортиқ мусиқачиларни бошқарган.
Саҳна чиқишига 950 га яқин томошабин ташриф буюрган. Томошабинлар робот ва оркестрни қарсаклар билан кутиб олди, дирижёр робот эса концертга келган инсонларга таъзим қилди.
Концерт раҳбари Чоу Су Ёлнинг сўзларига кўра, эшитиш қобилиятининг йўқлиги роботнинг сезиларли камчилиги, бироқ унинг ҳаракатлари ҳайратланарли даражада аниқ.
“Биз инсонларни роботлар билан алмаштирмоқчи эмасмиз, бу концерт инсонлар ва роботлар бирга яшаши ва бир-бирини тўлдириши мумкинлигини кўрсатади”, — дейди Чоу Су Ёль.
Дирижёр робот Корея саноат технологиялари институти томонидан яратилган. EveR-6 роботининг баландлиги 1,8 м. Оммавий ахборот воситалари робот бўғинлар ва билакларни тақлид қилувчи эгилувчан конструкциялар билан жиҳозлангани ҳақида ёзган.
Робот мусиқачиларни мустақил равишда ҳам, дирижёр билан бирга бошқара олади. Яқин келажакда роботни такомиллаштириш режалаштирилган.
Изоҳ (0)