Украина президенти Владимир Зеленский “Вагнер” асосчиси Евгений Пригожин кўтарган ҳарбий исёнга муносабат билдирди.
“Ёмонлик йўлини танлаган одам ўз бошига етади. Россия узоқ вақтдан бери ўзининг заифлиги ва аҳмоқона бошқарув шаклини пропаганда билан яшириб келди. Ҳозир бўлса бетартиблик шунчалар кўпки, ҳеч қандай ёлғон буни беркита олмайди.
Россиянинг заифлигига шубҳа йўқ. Бутунлай заиф. Россия ўз қўшинлари ва ёлланма аскарларини бизнинг заминимизда қанча узоқ ушлаб турса, ўзи учун шунча кўп муаммо орттиради. Буни ҳамма кўриб турибди.
Бизнинг барча қўмондонларимиз, барча жангчиларимиз нима қилишни билади”, — деди Зеленский.
Аввалроқ Россия президенти Владимир Путин Пригожиннинг хатти-ҳаракатлари юзасидан мурожаат билан чиққан эди. У “вагнерчи”ларнинг исёнини хиёнат ва орқадан пичоқ уриш, деб атади. Путин исёнчилар жазоланишини ваъда қилди.
Ундан кейин Чеченистон раҳбари Рамзан Қодиров ҳам Пригожин бошчилигидаги исённи “жирканч хиёнат” деб таърифлади. Қодиров Владимир Путиннинг мурожаатидаги “ҳар бир сўзни тўлиқ қўллаб-қувватлашини” айтди. Унинг сўзларига кўра, “Мудофаа вазирлиги ва Россия гвардиясининг Чеченистон республикасидаги бўлими жангчилари аллақачон кескинлик зоналарига жўнаб кетган”.
Пригожин бунга жавобан “вагнерчи”лардан ҳеч ким Россия президенти, ФХХ ёки бошқа бировнинг талабига биноан ўзини топширмоқчи эмаслигини айтди.
“Вагнер” исёни
Маълумот учун 23 июнь куни кечқурун Пригожин Россия мудофаа вазири Сергей Шойгуни “Вагнер” лагерларига ракета ҳужуми уюштиришга рухсат беришда айблади. Шундан сўнг Пригожин “адолат маршини” бошлашга ваъда берди, кўпчилик бу таҳдидни ҳарбий тўнтариш уюштиришга уриниш сифатида қабул қилди. Россия Федерал хавфсизлик хизмати Пригожинга қарши қуролли тўнтаришга уриниш бўйича иш очди.
24 июнга ўтар кечаси Ростов-Дон шаҳри “Вагнер” жангчилари томонидан босиб олинди. Шаҳар марказини Евгений Пригожинга бўйсунувчи қуролли шахслар эгаллади. Эрталаб Пригожин Россия Мудофаа вазирлиги ва Бош штаб раҳбарларининг ўринбосарлари билан учрашди. У Сергей Шойгу ва Валерий Герасимов “Вагнер”га топширилмагунча, ёлланма аскарлар “Ростовни тўсиб, Москвагача боришини” айтди.
Изоҳ (0)