“Тоттенҳэм” ҳужумчиси Ҳарри Кейн фаолиятини “Манчестер Юнайтед”да давом эттиришни хоҳламоқда.
Daily Mail нашрининг хабарига кўра, “Тоттенҳэм” президенти Дэниэл Леви молиявий талабларни пасайтирса, манкунианликлар музокараларга киришади деб ўйламоқда. “Шпорлар” 2024 йилда шартномаси ўз ниҳоясига етадиган Кейн учун 100 миллион фунт талаб қилмоқда.
“Юнайтед” эса 30 ёшли ва шартномаси тугашига бир йил қолган футболчи учун 100 миллион тўламаслигини маълум қилган. Ҳозирда манчестерликлар Ҳарри трансферидан ташқари “Аталанта” аъзоси Расмус Ҳейлунд трансфери билан ҳам ишламоқда.
Агарда “Тоттенҳэм” нархни 80 миллионга туширсагина Манчестер клуби раҳбарияти музокаралар столига ўтиради. “Манчестер Юнайтед” бош мураббийи Эрик тен Ҳаг шахсан ўзи Кейнни жамоада кўришни истайди.
Ҳарри учун яна бир вариант “Челси” жамоаси бўлиб турибди. “Аристократлар” бош мураббийи Маурисио Почеттино ҳам Кейн билан “Тоттенҳэм”да бирга ишлаган. Лекин Леви футболчини Лондоннинг бошқа клубига ўтишига рози бўлмайди.
“Реал”, “ПСЖ” ва “Бавария” каби жамоалар қизиқиш билдираётганига қарамай, Кейн “Манчестер Юнайтед” вариантини маъқул кўрмоқда.
Ҳарри Кейн жорий мавсум “Тоттенҳэм” сафида барча мусобақаларда 49 та ўйинда иштирок этиб, 32 та гол ва 5 та голли узатмага муаллифлик қилди.
Изоҳ (0)