Сурхондарё вилояти Денов туманида ҳаракатланиб кетаётган юк машинаси ёниб кетди. Вилоят ҳокимлиги ахборот хизмати ҳолат юзасидан маълумот берди.
Унга кўра, 16 июнь куни соат 12:25 лар чамасида Денов тумани “Минора” маҳалласи ҳудудида жойлашган “Минора” фермер хўжалигининг ғалладан бўшаган майдонида ҳаракатланиб кетаётган “Камаз” юк машинасида ёнғин содир бўлган. Келиб чиққан ёнғин сабаб юк машинасининг ғилдираклари ва мотор қисми қисман ёнган ва даладаги сомон пояга туташган. Натижада ғалладан бўшаган даланинг 2 гектар майдонидаги сомон пояси ёнган.
Воқеа жойига туман Фавқулодда вазиятлар бўлимининг ёнғин-қутқарув экипажлари соат 12:41 да етиб бориб, ёнғин соат 12:43 да қуршаб олинган ва соат 13:02 да батамом ўчирилган.
Вилоят Фавқулодда вазиятлар бошқармаси берган бирламчи маълумотларга кўра, ёнғинга “Камаз” юк машинасининг электр симларидаги қисқа туташув сабаб бўлган. Ёнғиндан тан жароҳати олганлар йўқ.
Изоҳ (0)