Қорақалпоғистонда ўзига алоқаси бўлмаган фермер хўжаликларига тегишли 620 гектар ерни мансабдор танишлари орқали 400 минг долларга расмийлаштириб бермоқчи бўлган фермер хўжалик раҳбари ушланди. Бу ҳақда ЎзА хабар берди.
Маълум қилинишича, у олдиндан 200 минг долларни ўз қариндоши орқали олган вақтида ДХХнинг Хоразм вилояти бўйича бошқармаси ва Иқтисодий жиноятларга қарши курашиш департаментининг ҳудудий бошқармаси ходимлари томонидан ашёвий далиллар билан ушланган.
ДХХнинг Самарқанд вилояти бўйича бошқармаси ходимлари томонидан Бош прокуратура ҳузуридаги департаментнинг ҳудудий бошқармаси ходимлари билан ҳамкорликда ўтказилган тезкор тадбирда Оқдарё туманидаги фермер хўжалик раҳбари мазкур хўжаликнинг 1,5 гектар ер майдонини иссиқхона ташкил қилмоқчи бўлган фуқарога 120 минг долларга сотишга келишиб, олдиндан 60 минг доллар олган вақтида ушланган.
Бошқа ҳолатда эса “Ургут Савдо Комплекси” МЧЖда ишловчи шахс ўзганинг ишончига кириб, унга мазкур савдо комплекси ҳудудидан 60 квадрат метр ер майдони олиб бериш учун 40 минг доллар талаб қилиб, олдиндан 30 минг доллар олган вақтида ушланган.
Наманган вилоят кичик саноат зоналарини бошқариш ва мувофиқлаштириш дирексиясининг туманлардан биридаги масъул ходими ўзи фаолият юритувчи туманда жойлашган кичик саноат зонаси ҳудудидан 80 сотих ер майдони олиб бериш учун тадбиркорлик билан шуғулланмоқчи бўлган фуқародан 300 миллион сўм олган вақтида ДХХ ходимлари томонидан ушланган.
Қайд этилишича, ҳозирда барча ҳолатлар юзасидан мазкур шахсларга нисбатан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.
Изоҳ (0)