Япония 40 минг аҳолига мўлжалланган автоном сузувчи шаҳар қуради

Футуристик орол-шаҳарни яратиш бўйича жуда юксак режалар Япониянинг N-Аrk компаниясига тегишли.

Dogen Citi деб номланган лойиҳа иқлим ўзгариши билан боғлиқ денгиз сатҳининг ҳар қандай кўтарилишига бардош беришга ва 40 000 кишини (10 000 доимий аҳоли, қолгани туристлар) электр энергияси, озиқ-овқат ва сув билан таъминлашга мўлжалланган.

Айланаси 4 километрга яқин бўладиган шаҳарда туризм ва тиббиёт муассасалари, шунингдек, ракета учириш майдончаси бўлади.

Ишлаб чиқувчиларнинг фикрига кўра, думалоқ шакл шаҳарга сунами пайтида ҳам вайрон бўлмай туришга ёрдам беради — гарчи бу ҳақда қўшимча тафсилотлар ҳали ошкор қилинмаган бўлса ҳам.

Умуман олганда, лойиҳа учта алоҳида ҳудудга бўлинади:

• турар жой ҳудуди;
• табиий равишда (яъни денгиз орқали) совитиладиган ва шаҳар бошқаруви тизими ҳамда тиббий-тадқиқот муассасаларини ўз ичига олган сувости маълумотлар маркази;
• сунъий кўрфаз ичида қўшимча сузувчи архитектура.

N-Аrk ҳисоб-китобларига кўра, шаҳар ҳар йили тахминан 2 миллион литр сув талаб қилади ва 3288 тонна чиқиндини утилизация қилади.

Шунингдек, йилига қарийб 7 минг тонна озиқ-овқат ва 22 миллион 265 минг кВт электр энергияси ишлаб чиқаради.

Буларнинг барчаси қандай тақдим этилиши ҳақида тафсилотлар ҳозирча мавжуд эмас. 

Шаҳарнинг аниқ қаерда қурилиши ҳам аниқланмаган, аммо лойиҳани 2030 йилгача якунлаш режалаштирилмоқда.