Жиззахда “Янги Ўзбекистон” массивида қурилаётган 16 қаватли уйлардан бирининг зилзилага бардошлилиги текширилди.
Қурилиш ва уй-жой коммунал хўжалиги вазирлигининг маълум қилишича, Шароф Рашидов тумани “Оқтош Ота” МФЙ ҳудудида қурилаётган уй “вибродинамик” ускуна ёрдамида 7 баллик зилзилага тенг тебраниш билан синовдан ўтказилди.
Унда қурилиш соҳасида назорат инспекцияси масъуллари, лойиҳалаш ва қурилиш ишлари бўйича мутахассислар иштирок этди.
Синовда қатнашган Турин политехника институти биноларни сейсмик тадқиқ қилиш лабораторияси раҳбари Бекмурод Каримовнинг “Ўзбекистон 24” телеканалига берган интервьюсида айтишича, синов 7 босқичда ўтказилди. Аммо хулоса чиқаришга ҳали эрта. Бу мураккаб жараён бўлиб, синов жараёнида олинган маълумотлар йиғиб, таҳлил қилинади.
Президент фармони асосида Республиканинг сейсмик фаол зоналарида баландлиги 9 қават ва ундан юқори бўлган биноларни зилзилабардошлилигини ошириш, сифатини таъминлаш ҳамда камчиликларини олдиндан бартараф этиш мақсадида гидродинамик ускуна ёки замонавий рақамлаштирилган ускуналар ёрдамида текширувлар мунтазам олиб бориладиган бўлди.