Москвада ўзбекистонлик муҳожир полиция ҳужжатларини текширгани сабаб вафот этгани ҳақидаги хабарлар рад этилди

Ташқи меҳнат миграцияси агентлиги Россия пойтахтида Ўзбекистон фуқароси вафот этгани айтилган хабарларга муносабат билдирди.

Ижтимоий тармоқларда Москва шаҳрида 48 ёшли ўзбекистонлик меҳнат мигрантининг полиция томонидан ҳужжатларини текшириш вақтида вафот этгани ҳақида хабарлар тарқалди.

Ташқи меҳнат миграцияси агентлигининг Москва шаҳридаги ваколатхонаси томонидан ушбу ҳолат ўрганилиши натижасида маълум бўлишича, фуқаро О.О. соғлиғи ёмонлашгани сабабли Боткина номидаги шаҳар шифохонасига жойлаштирилган.

Шифохона ходимлари томонидан кўрсатилган тиббий ёрдамларга қарамасдан, у вафот этган. Полиция ходимлари томонидан ҳужжатларини текшириш натижасида унинг вафот этгани ҳақидаги маълумот тасдиқланмаган.

“25 май куни ушбу вафот этган фуқаронинг жасади Ўзбекистонга қайтарилган”, — дейилади хабарда.

Хориждаги ўзбекистонликлар ўлими

Май бошларида Қозоғистоннинг Қизилўрда шаҳридаги қурилишда ўзбекистонлик эркак ҳалок бўлганди. Шунингдек, Россия қамоқхонасидан Украинадаги урушга “сафарбар қилинган” 23 ёшли ўзбекистонлик ҳалок бўлгани, Туркияда ўзбекистонлик фуқаро парда тикадиган машина орасида қисилиб қолиши оқибатида вафот этгани, Россиядаги уйда юз берган ёнғинда 3 нафар ўзбекистонлик ҳалок бўлгани тўғрисида хабар берилганди.