Ижтимоий тармоқларда Асака туманида ЙҲХБ ходими томонидан содир этилган ЙТҲ оқибатида бир киши вафот этиб, яна бири ногирон бўлиб қолган бўлса, жазо тайинланмагани ҳақида хабар тарқалди. Ҳолатга Андижон вилояти прокуратураси муносабат билдирди.
Унда қайд этилишича, ушбу ҳолат бўйича 2022 йил 10 декабрда Асака туман прокуратураси томонидан вилоят ИИБ ЙҲХБ ходими М.Э.га нисбатан Жиноят кодексининг 266-моддаси 2-қисми билан жиноят иши қўзғатилиб, туман прокуратураси томонидан тергов ҳаракатлари олиб борилган. Тергов натижасига кўра, ушбу модда билан айблов эълон қилиниб, жиноят иши 2023 йил 10 март куни жиноят ишлари бўйича Асака туман суди муҳокамасига юборилган.
Судда айбланувчи Э.М. ва унинг ҳимоячилари томонидан далилларни номақбул деб топиш тўғрисида илтимоснома келтирилиб, ўтказилган дастлабки эшитув якунига кўра, суднинг 28 апрелдаги ажрими билан илтимосномани қаноатлантириш рад этилган.
Ўз навбатида айбланувчи Э.М.нинг апелляция шикояти асосида жиноят иши 3 май куни вилоят судининг жиноят ишлари бўйича судлов ҳайъатида кўрилиб, 4 май куни суднинг ажрими бекор қилинган ва қайта кўриб чиқиш учун судга қайтарилган.
Жиноят ишлари бўйича Асака туман суди томонидан ўтказилган дастлабки эшитув натижасига кўра, 8 майдаги ажрим асосида илтимоснома қаноатлантирилиб, процессуал ҳаракатларни ўтказиш учун туман прокуратурасига қайтарилган.
Ҳозирда жиноят иши бўйича тергов ҳаракатлари Асака туман прокуратураси томонидан олиб борилмоқда.