Бухоро вилоятида фаолият юритувчи тадбиркорлар Бош прокурор Ниғматилла Йўлдошевнинг Қарши шаҳрида бўлиб ўтган сайёр қабулида бўлиб, Epsilon компаниясининг зўравонлигидан шикоят қилди. Бу ҳақда мазкур қабулда бўлган “Дарё” мухбири хабар берди.
“Олот нефть ва газ қидирув экспедицияси” МЧЖ масъули Қорёғди Очиловнинг айтишича, Epsilon компанияси МЧЖга қарашли 5 дона Россияда ишлаб чиқарилган “Уралмаш-3D” бурғулаш қурилмаларини зўравонлик билан тортиб олиб, ҳеч қандай ҳақ тўламаган ҳолда фойдаланиб келмоқда.
“Биз бу бўйича судга ҳам мурожаат қилдик. Суд Epsilon компаниясига 2019 йил март ойида мулкни қабул қилиш ва топшириш далолатномалари орқали берилган 5 комплект бурғулаш қурилмаларини 2022 йил ўз эгасига топшириш мажбуриятини юклади. Бу ҳақда ҳатто Олий суд қарори ҳам бор. Бу мажбуриятни бажариши керак бўлган МИБ эса ўзига юклатилган вазифани уддалай олмаганлиги боис, ҳамон ўзимизга тегишли бурғулаш ускуналарини ололганимиз йўқ. Шу масалада Бош прокурордан ёрдам сўраб келдик”, — дейди Бош прокурордан умид қилиб борган Қорёғди Очилов.
Мурожаатчиларнинг айтишича, улар Бош прокурор қабулига киролмаган.
“Бизнинг ишимиз суд орқали МИБнинг Бобур Панжиев исмли масъулига юклатилган экан. Ижро ҳаракатлари қандай кетаётганини билиш ва ускуналаримизни тезроқ олиш учун Бухородан Қашқадарёга беш соатлаб йўл юриб, умид билан келамиз. Аммо МИБ масъули бизни қабул ҳам қилмайди. Кимга мурожаат қилишга ҳайронмиз. МИБ ходими қаерга борсанг бор, Epsilon‘дан бу ускуналарни ундириш бизнинг қўлимиздан келмайди деди. Шу сабаб Қарши шаҳрида бўлиб ўтган Бош прокурор қабулидан умид қилиб келгандик. Лекин Бош прокурор қабулига киролмадик. Бизни Бош прокуратуранинг 17-бўлимдаги масъуллар қабул қилишди. Epsilon масаласи қийин, уни бажариб бўлмаяпти дейишяпти”, — дейди мурожаатчилар.
МЧЖда бошқарув раиси ўринбосари сифатида ишлаб келаётган Иброҳим Чўллиевнинг маълумот беришича, МЧЖ Россияда ишлаб чиқарилган “Уралмаш-3D” бурғулаш қурилмаларини 2017 йилда сотиб олган бўлиб, айни кунгача харид шартномасида кўрсатилган пулларни тўлаб келмоқда.
“Энг қизиғи 2017 йилда харид қилинган бурғулаш ускуналарининг пулини ҳали-ҳамон биз тўлаяпмиз. Лекин бундан Epsilon фойдаланмоқда. Бунинг учун бизга на пул тўлайди, на бирор бир ҳақ беради. Қайси ташкилотга мурожаат қилсак, Epsilon’га кучимиз етмайди дейди. Қандай қилиб, суд чиқарган қарорни ижро қилмаслик мумкин? Бунинг учун МИБга қонуний ваколат берилган-ку”, — дейди МЧЖ директори ўринбосари.
Мазкур ҳолатга изоҳ берган МИБнинг Қашқадарё вилоят бошқармаси масъули Бобур Панжиев “Олот нефть ва газ қидирув экспедицияси” МЧЖ аввал “Ўзбекнефтгаз”га қарашли ташкилот бўлганини, шу сабаб 5 та бурғулаш ускунаси “Ўзбекнефтгаз” мулки бўлганини, аммо ташкилот “Ўзбекнефтгаз” таркибидан чиқаётган пайтда бурғулаш ускуналари МЧЖ балансида қолиб кетганини айтмоқда.
“Epsilon шу важ билан бизга чиқиб, ‘Ўзбекнефтгаз’га қарашли бурғулаш ускуналари Вазирлар Маҳкамаси қарорига асосан уларга берилганини, айни пайтда ҳам ускуналар давлат мулки эканини айтиб, МЧЖга қатариб бермаслигини билдирган. Ва шу сабаб ҳам судга мурожаат қилган”, — дейди масъул.
Таъкидланишича, суд қарорига кўра 5 та бурғулаш ускунасини МЧЖга олиб бериш ҳақидаги ижро ҳужжати Бюронинг Муборак туман бўлими иш юритувига 2022 йилнинг 4 июнь куни келиб тушган.
“Косон туманлараро иқтисодий судининг 2022 йил 24 мартдаги ижро варақасига асосан қарздор Epsilon Development Company МЧЖ зиммасига 2019 йил март ойида мулкни қабул қилиш ва топшириш далолатномалари орқали берилган 5 комплект Россияда ишлаб чиқарилган ‘Уралмаш-3D’ бурғулаш қурилмаларини ундирувчи ‘Олот нефть ва газ қидирув экспедицияси’ МЧЖга қайтариб бериш мажбурияти юкланган. Юклаш тўғрисидаги ижро ҳужжати бюронинг Муборак туман бўлими иш юритувига 2022 йил 4 июлда келиб тушган. Ижро ҳаракатлари давомида қарздордан 1 комплект бурғулаш қурилмалари ундирувчи ‘Олот нефть ва газ қидирув экспедицияси’ МЧЖга олиб берилган”, — дейилади МИБнинг вилоят бошқармаси расмий ахборотида.
Бобур Панжиевнинг аниқлаштиришича, қарздор Epsilon Development Company МЧЖ 2023 йил 10 март куни хат билан мурожаат қилиб, “Олот нефть ва газ қидирув экспедицияси” МЧЖга қайтарилиши белгиланган 5 комплект бурғулаш ускуналари Вазирлар Маҳкамасининг 2019 йил 6 февралдаги 97-сонли қарорига асосан уларга берилганини, қарор ҳали ҳам амалда ва бекор қилинмаганлигини билдирган.
“Шунга кўра 2023 йил 15 март куни Косон туманлараро иқтисодий судга тушунтириш сўраб ариза билан мурожаат қилинган. Келгусида суднинг якуний хулосасига асосан ижро ҳаракатлари амалга оширилади”, — дейди МИБ масъули.
Мурожаатчилар МИБнинг суд қарорини бир йилдан бери ижро қилмаётганидан норозилигини таъкидламоқда.
“МИБ мулк кимники, қай тартибда бизга келиб қолган, нега келиб қолган деган саволларни ўртага ташламай, суд қарорини муҳокама қилмай, ижро билан шуғуланиши керак эмасми? Ёки МИБ ҳар доим суднинг қарорини муҳокама қилиб, қарорга ишончсизлик билдириб келадими? Унинг иши қарорни ижро қилиш эмасми?”, — дейди мулкини ололмаётганини айтаётган мурожаатчилар.
“Дарё” воқеалар ривожини кузатишда давом этади.
Изоҳ (0)