Франция собиқ президенти қамоқ жазосига ҳукм қилинди

Париж аппеляция суди собиқ президент Николя Саркозини “телефон суҳбатларини тинглаш иши” бўйича бир йиллик қамоқ жазосига ҳукм қилди. Бу ҳақда Deutsche Welle хабар берди.

Ишда собиқ президентдан ташқари унинг адвокати Терри Эрзог ва собиқ судья Жилберт Азибер ҳам иштирок этмоқда. “Телефон суҳбатларини тинглаш” иши бўйича қарор 2021 йил март ойида чиқарилган. Саркози коррупция ва таъсир доирасини савдолашишда айбдор деб топилган, суд уни уч йилга озодликдан маҳрум қилган, улардан иккитаси шартли жазони ўташдан иборат.

Эрзог ва Азибер ҳам коррупцияда айбдор деб топилган. Маҳаллий матбуотнинг ёзишича, Саркози жазони қамоқхонада эмас, уйда, электрон билагузук билан ўтайди.

“Телефон суҳбатларини тинглаш” иши

Айблов томонига кўра, Саркози адвокат орқали Азиберга Монако князлигида лавозим олишига ёрдам беришга ваъда берган. Бунинг эвазига Саркози унинг сайловолди кампанияси L’oreal томонидан ноқонуний молиялаштирилиши бўйича тергов жараёни қандай кетаётгани ҳақида махфий маълумот олишни хоҳлаган.

2013 йил сентябрида ушбу молиялаштириш иши бўйича тергов доирасида Саркозининг телефон суҳбатлари тингланган. 2014 йил бошида суд Саркози, Эрзог ва Азибер ўртасида тузилган “коррупция шартномаси” мавжудлигини аниқлаган.

Ишда далил сифатида собиқ президент ва унинг адвокати ўртасидаги тингланган суҳбатлар ёзувлари келтирилган. Суҳбатдошлар бир-бирларини ҳеч қачон исмини айтиб чақирмаган бўлсалар-да, экспертиза Саркози (суҳбат учун Пол Бисмут тахаллусидан фойдаланган) сўзловчилардан бири эканини тасдиқлаган.

2022 йил декабрь ойида “телефон суҳбатларини тинглаш иши” бўйича аппеляция жараёни бошланган. Саркози билан бирга адвокат ва судья аппеляция шикояти берган.
Прокуратура Париж аппеляция судидан иш бўйича айбланувчиларни бир хил муддатга – уч йиллик синов муддатига ҳукм қилишни сўраган.

Саркози аллақачон жазони ўтаган

Эслатиб ўтамиз, 2021 йилда Франциянинг собиқ президенти 2012 йилда бўлиб ўтган сайловолди кампаниясини ноқонуний молиялаштирганликда айбдор деб топилганди. Айбловга кўра, собиқ президент ортиқча харажатларни яшириш учун сохта банк ҳисоб рақамларидан фойдаланган.

Саркозининг айби жиноий ҳаракатлар содир этилган вақтда давлат раҳбари бўлгани билан оғирлашган. Унинг ўзи ҳам унга қўйилган айбловлар асоссиз эканини бир неча бор таъкидлаган. Кейин Саркози бир йил қамоқ жазосига ҳукм қилинган ва жазони уй қамоғида ўтаган.