Tesla бош директори Илон Маск масофадан туриб ишлашни “ахлоқий жиҳатдан нотўғри” деб атади. Шу боис у коронавирус пандемияси даврида оммалашиб кетган ушбу амалиётни танқид қилди.
CNBC мухбири Девид Фаберга берган интервьюсида Элон Маск Силикон водийсининг техник ишчиларини “ла-ла-лендда яшовчи ноутбуклар синфи” деб атади. У Фаберга офисда ишлаш унумдорликни оширишига ишонишини айтди ва COVID-19 чекловлари олиб ташланганидан кейин офисга қайтишдан бош тортган ходимлар такаббурликни бас қилиб, бошқалар каби ишхонага қайтиши кераклигини таъкидлади.
“Сиз уйдан ишламоқчисиз, лекин машинангизни ишлаб чиқарадиганларни заводда ишлашга мажбурламоқчимисиз? Сизга овқат етказиб берадиган одамларчи — улар уйдан ишлай олмайди. Уйингизни таъмирлайдиган одамлар-чи? Улар уйдан ишлай олмайди, сиз ишлайверасизми? Бу ахлоқий жиҳатдан тўғрими? Нотўғри”, — деди Маск.
Фабер ундан бу ахлоқ масаласи деб ўйлайсизми, деб сўраганида, тадбиркор ижобий жавоб берди:
“Бу иш масаласи, лекин ахлоқий масала ҳам. Одамлар такаббурликни бас қилиши керак, чунки улар ўзлари ишлаётган пайтда қолганлардан уйдан ишламасликни сўрамоқда. Бу нотўғри”.
Илон Маск масофадан ишлашни очиқ танқид қилиб келади. Бизнесмен Twitter’ни сотиб олгач, барча ходимларга энди уйдан ишлашга рухсат берилмаслиги ва ҳафтасига 40 соат офисда бўлиши кераклиги ҳақида хат юборган.
Изоҳ (0)