Андижон вилоятининг Шаҳрихон тумани "Қуруқсой" маҳалласида яшовчи фуқаролар “Дарё”га мурожаат қилиб, “Обод қишлоқ” дастури доирасида ҳудуддаги 35-умумтаълим мактаби капитал таъмирлашга тушганлигини, бироқ белгиланган муддатдан тўрт ой ўтган бўлса-да муассасадаги қурилиш ишлари якунланмаётгани сабабли фарзандлари қўшни қишлоқдаги мактабларга қатнаб ўқиётганини билдиришган. Шунингдек, 26 апрель куни юз берган йўл-транспорт ҳодисаси барча ўқитувчи ва ота-оналарни саросимага солиб қўйганини билдиришган. “Дарё” мухбири мурожаатни ўрганиш мақсадида Шаҳрихон туманида бўлди.
Айтишларича, 6-синф ўқувчилари 4-соат дарсдан кейин уйга велосипедда қайтаётган бўлишган. Шунда мактабни ўтган йили тамомлаган собиқ ўқувчилардан бири транспорт воситасини бошқариб келаётиб, ўқувчиларни уриб юборган. Натижада бир нафар ўқувчи шифохонада вафот этган бўлса, яна бир нафари оғир тан жароҳати олган.
“Дарё” мухбири Шаҳрихон туман ички ишлар бўлими йўл ҳаракати хавфсизлиги гуруҳи катта инспектори Диёрбек Абдураззоқов билан боғланганида у ҳақиқатан йўл-транспорт ҳодисаси юз берганлиги ва бир нафар фуқаро вафот этганлигини тасдиқлаган.
“Апрель ойи охирларида Қуруқсой маҳалласидан ўтувчи автомобиль йўлида йўл-транспорт ҳодисаси юз берган. Йўлда келаётган автомашина велосипедда кетаётган 3 нафар болани уриб кетган. Уларнинг барчаси туман шошилинчи тез тиббий ёрдам бўлимига олиб келинган. Бир нафарига ҳеч қандай жароҳат етмаган, фақат қўрқиб кетган. Унга биринчи ёрдам кўрсатилиб, уйига жавоб берилган. Иккинчиси қошлари шилинган, ҳушсиз ҳолатда олиб келинган. Икки кун деганда ўзига келгач палатага олинган, ҳозирда ҳолати анча яхши. Учинчи ўқувчи эса икки-икки ярим соат давомида кўрсатилган тиббий муолажаларга қарамасдан шифохонада вафот этган”, - дейди Диёрбек Абдураззоқов.
Диёрбек Абдураззоқовнинг қўшимча қилишича, ЙТҲ содир этган шахс ҳеч қандай бошқарув ҳуқуқи бўлмасдан танишига тегишли транспорт воситасини бошқариб келаётган бўлган.
35-умумтаълим мактаби директори Мусажон Байзаковнинг айтишича, мактаб “Обод қишлоқ” давлат дастури доирасида капитал таъмирлашга тушган бўлиб, лойиҳага асосан ишлар 2022 йилнинг 31 декабрига қадар тугалланиши лозим бўлган. Бироқ молиявий қийинчиликлар сабабли шартнома 2023 йилнинг 31 мартига қадар чўзилган. Аммо шу кунга қадар ишлар ўз якунига етмаган.
“Мактабимда 541 нафар бола таълим олади. Уларга 37-38 нафар ўқитувчи билим бериб келади. Мактабимиз 2022 йил август ойида “Обод қишлоқ” давлат дастури доирасида капитал таъмирлашга тушганида хурсанд бўлдик. Лекин ишлар охирига етмасдан йўлнинг носозлиги сабабли мактабимизга келиб-кетиш жараёнида бир ўқувчимизни йўқотдик. Бунга сабабчи сифатида энг аввало ўзимни деб биламан. Чунки бу бахтсиз воқеанинг олдини эртароқ олишимиз керак эди.
Бунга мактабимиз биносини таъмирлашга жавобгар мутасаддилар айтилган муддатда ишни якунлаб, топширишганида бундай бўлмасди. Мана бир ўқув йилидан буён болларимиз қишин-ёзин шу уч километр масофага қатнаб, таҳсил олишмоқда. Ҳеч ким болларни бориб келишдаги хавфсизлигига кафолат беролмаяпти, аммо сезиларли натижа ҳам кўрсата олишмаяпти. Ваҳоланки, лойиҳа бўйича реконструкция ишлари дастлаб ўтган йилнинг 31 декабрига, кейинчалик тузилган шартнома бўйича эса жорий йилнинг 31 мартига қадар тугалланиши лозим эди. Аммо май ойи кириб келган бўлса ҳам ишлар қолиб кетган.
Биз юқори ташкилотлардан, вилоят ва туман ҳокимликларидан дарсга бориб келишлари учун вақтинчалик автобус қатновини йўлга қўйиб беришлари учун ёрдам сўраганмиз. Шунда биринчи маротаба сентябрь ойида битта автобус қўйиб берилди. Бироқ пахта терим мавсуми бошланиши билан ушбу автобусни вилоят транспорт бошқармаси олиб қўйди. Ундан кейин яна қилган мурожаатимизга асосан туман ҳокими яна бир автобусни бириктириб берди. Бу автобус ўн кунча қатнаб, ҳеч қандай сабабсиз келмай қўйди. Шундан кейин яна мурожаат қилганимиздан кейин халқ таълими бўлими томонидан тумандаги 15-махсус мактаб-интернатининг автобусини беришди. У ҳам бир ҳафтача қатнаб, бу ерга келганим учун менга ойлик тўламайди, деб келмай қўйди.
Ўқувчиларимиз ҳар куни асосий автомобиль йўлидан қатнашади. Келаётганда аҳамият берган бўлсангиз, ман шу йўлда бирорта тезликни чекловчи ёки бошқа зарур белгилар қўйилгани йўқ. Ваҳоланки, бу йўлда ҳаракатланаётган транспортлар ўта тез ҳаракатланишади. Чекка ҳудуд бўлганимиз учун ҳеч қандай ҳужжатсиз ҳам транспорт бошқараётган ёшларни кўришингиз мумкин. Улар умуман қоидаларга амал қилишмайди. Бу инсон вафоти билан боғлиқ йўл-транспорт ҳодисаси биринчи эмас. Бундан кейин умуман бўлишини хоҳламайман.
Юқори мутасадди ташкилот раҳбарлари мактабимизни тезроқ таъмирдан чиқариб беришса, ўқувчиларимизни ўзимизда ўқитсак”,- дейди.
Мактаб директорининг таъкидлашича, ишларни тезроқ якунлашда ёрдам сўраб, вилоят ҳокимигача хат киритилган, аммо натижа йўқ. Унинг қайд этишича, бир неча маротаба қилинган мурожаатларга субпудратчи ташкилот ишларни тўхтаб қолишига маблағ етарли эмаслигини рўкач қилган. Аммо референдум олдидан мактаб олд қисми ва учта хона қурилишини якунлаш учун маблағ топилган.
“Деярли ҳамма асосий ишлар бўлди. Фақат озгина, 20 фоиз иш қолди холос. Агар иссиқлик тизимини ҳисобга олмасак, бинонинг ичида фақат пол қисми қолган холос. Қурувчига бир неча маротаба мурожаат қилганмиз. Бироқ у қилиб беришини айтиш билан чекланиб қоляпти. Субпудратчи эса ишларни тўхтаб қолишига маош йўқлиги, маблағ етарли эмаслигини рўкач қиляпти. Бу бўйича вилоят ҳокимига ҳам расмлар билан маълумот киритганмиз. Аммо натижа йўқ.
30 апрель куни ўтказилган референдумда мактабимиз биноси референдум участкаси сифатида фаолият юритди. Ушбу тадбирга 18 апрель куни тайёргарлик кўрдик. Умуман тайёр бўлмаса ҳам кириш қисм ва учта хонани битказиб, иложи борича тезлаштириб, керакли қисминигина битказдик. Агар референдумга тайёргарлик кўргандек иш ташкил қилинса, кўпи билан йигирма кунда таъмирлаш ишлари якунланиб, фойдаланишга топшириш мумкин. Афсуски, референдум ўтгач барча ишлар яна ташлаб қўйилди”,- дейди мактаб директори Мусажон Байзаков.
Мактабнинг 6-“А” синф раҳбари Дилрабо Раҳмонованинг айтишича, қатнов йўлида бир вақтнинг ўзида иккита автомобиль ҳаракатланиши қийин, бундан ташқари йўлнинг икки томонига экилган бодомлар пиёдаларнинг юриши учун қийинчилик туғдиради.
“Ўқувчиларимиз дарсдан сўнг велосипедда кетаётган бўлган. Шунда кутилмаганда қарама-қарши томондан келаётган автомобилнинг бошқарувни йўқотиши оқибатида уч нафар ўқувчимиз билан бахтсиз воқеа содир бўлган. Натижада Ҳафизулло исмли ўқувчимиз оғир тан жароҳати олиши оқибатида тиббиёт бирлашмаси бўлимида вафот этди. Талантбек ва Асадбек исмли ўқувчиларимиз эса турли даражадаги тан жароҳатлари билан шифохонага ётқизилиб, тегишли тартибда шифокорлар назоратида даволанмоқда.
Ушбу ҳолат синфимиз учун жуда катта йўқотиш бўлди. Ўқувчиларимизда қўрқув пайдо бўлган. Агар мактабимиз битган бўлганида, балки шу ҳодиса бўлмасмиди, деб ўйланиб қоламиз. Чунки ўқувчиларимиз ҳар куни бир кишининг умрига зомин бўлган ўша йўлдан келишади. Йўллар носоз, бир вақтнинг ўзида иккита автомобиль ҳаракатланиши қийин. Ўқувчиларимизга йўл четларида юринглар десак, ҳатто пиёдалар йўлакларига ҳам одамлар бодом экиб юборганлиги учун юришнинг имкони йўқ. Ўқувчиларга ҳар куни йўлакдан юринглар деб огоҳлантирганимда улар “Устоз йўлакдан юрганимизда кўзимизга бодом шохлари кириб кетяпти” дейишади. Ҳақиқатан йўлакда ҳам юриб бўлмайди. Шу бахтсиз воқеадан кейин нафақат ота-оналар балки, биз ўқитувчилар ҳам саросимага тушиб қолганмиз”, дейди синф раҳбари Дилрабо Раҳмонова.
Шаҳрихон тумани ҳокимининг қурилиш, коммуникациялар, коммунал хўжалик, экология ва кўкаламзорлаштириш масалалари бўйича ўринбосари Илҳомжон Аҳмедовнинг айтишича, реконструкция ва таъмирлаш ишлари молиявий қолоқлик сабабли чўзилиб кетган. Маҳаллий бюджетдан пул ажратилиши билан якунига етиши мумкин.
“Ушбу мактаб “Обод қишлоқ” дастурига киритилган бўлиб, лойиҳани "XXI аср бунёдкори" МЧЖ ютиб олган. Таъмирлаш ишлари молиявий манбасида қолоқлик бўлгани учун чўзилиб кетган. Якунига етиш мақсадида кунора вилоятдан суриштириб турибман, айтишларича ҳозир молиялаштириляптикан.
Агар пулни бериш менинг қўлимда бўлганида берворган бўлардим. Афсуски маблағ масалалари маҳаллий бюджетдан бўлганлиги учун энди ҳал бўляптикан. Шуларни ҳам ҳисобга олиш керак. Мени имзойим билан ҳал бўлганда аллақачон имзолаб берардим, аммо менинг қўлимда ёки ваколатимда эмас. Лекин ваколатим доирасида ҳаракат қилганман, тегишли юқори ташкилотларга хат билан чиққанман. Бироқ ваколатим ундан буёғига ўтмайди. Иш нега тўхтаб қолганлиги бўйича бемалол вилоят ҳокимлиги қурилиш котибиятига чиқиб сўрасангиз ҳам бўлаверади. Сиздан илтимос, яхши томонларини ҳам гапириб кетинглар, ҳамма фақат ёмон томонини кўриб кетяпти-да. Ўқувчиларнинг хавфсизлигини таъминлаш мақсадида вилоят ҳокимлиги томонидан автобус қўйилган”, - дейди Илҳомжон Аҳмедов.
“Дарё” мухбири Илҳомжон Аҳмедовдан юз берган йўл-транспорт ҳодисаси юзасидан сўраганида бу бўйича жавоб бермаслигини, айни шу масала бўйича туман ички ишлар бўлими маълумот беришини билдирган. Шунингдек, “бу бўйича ана қўлида ҳайдовчилик гувоҳномаси бўлмаган, вояга етмаган боладан сўранглар, нега авария қилганини?" — дея қўшимча қилган.
“Дарё” воқеалар ривожини кузатишда давом этади.
Изоҳ (0)