Самарқанд вилояти Пахтачи туманида 9 май куни портлаш содир бўлгани тўғрисида хабар берилганди. Вилоят ИИБнинг маълум қилишича, ҳолат юзасидан жиноят иши қўзғатилган.
“Пахтачи туманида содир бўлган ёнғин ҳолати юзасидан вилоят ИИБ ҳузуридаги Тергов бошқармаси томонидан Жиноят кодексининг 259-моддаси (ёнғин хавфсизлиги қоидаларини бузиш) 1-қисми билан жиноят иши қўзғатилиб, судга оид тиббиёт, ёнғин-техника ва баҳолаш экспертизалари тайинланган”, — дейилади хабарда.
Фавқулодда вазиятлар вазирлигига кўра, ёнғин “Янгиобод” маҳалласида жойлашган тумангаз корхонаси ҳудудидаги портлаш оқибатида содир бўлган. Газ қуйиш шохобчаси ҳудудида бўлган 3 та Isuzu автомашинаси ва уларда сиғими 50 литрли суюлтирилган углеводород газлари бўлган баллонлар ёниб зарарланган.
Ҳодиса шохобчадаги MAN русумли суюлтирилган газ ташувчи автомашинадан газни захира сиғимига бўшатиш жараёнида техника хавфсизлиги қоидаларининг бузилиши оқибатида юзага келгани тахмин қилинмоқда. Дастлабки маълумотларда айтилишича, ҳодиса оқибатида бир нафар фуқаро тан жароҳати олган.
Изоҳ (0)