АҚШ президенти Жо Байден Кремль саройига дрон ҳужумидан сўнг Россия президенти Владимир Путин билан музокара ўтказиш ниятида эмас. Бу ҳақда РИА Новости агентлигига Оқ уй Миллий хавфсизлик кенгаши вакили маълум қилди.
"Йўқ, мен ҳозирда ҳеч қандай режалардан хабардор эмасман", — деди манба музокаралар эҳтимолини изоҳлар экан.
Кремлга кўра, тунда икки дрон Владимир Путиннинг қароргоҳига ҳужум қилишга уринган. Шу билан бирга, президент матбуот хизмати бу ҳақда фақат 3 май куни тушдан кейин, Москва мери пойтахтда дронлардан фойдаланиш тақиқланганини эълон қилганидан кейин маълум қилди.
Кремль воқеани Украинанинг режаланган террорчилик ҳаракати ва “Ғалаба куни” арафасида президентга қилинган суиқасд деб атади. Владимир Путин ҳужум вақтида Ново-Огарёводаги қароргоҳида бўлган. Тергов қўмитаси Кремлга учувчисиз самолёт ҳужумини теракт сифатида баҳолади. Украина президенти Владимир Зеленский воқеага алоқадорлиги ҳақидаги айбловларни рад этди.
Изоҳ (0)