Ўзбекистон Республикаси Қизил китобига киритилган тожик кавраги ўсимлигига мораторий жорий этилди. Бу ҳақда Табиат ресурслари вазирлиги ахборот хизмати хабар берди.
Бу президентнинг 2023 йил 16 февралдаги “Яйловларни муҳофаза қилиш ва улардан оқилона фойдаланишни таъминлашга доир қўшимча чора-тадбирлар тўғрисида”ги фармонига асосан амалга оширилди.
Таъкидланишича, ҳозирги вақтда каврак ўсимлигидан ноқонуний фойдаланиш мазкур турнинг камайиб кетишига сабаб бўлиб, унинг такрор ва табиий кўпайишига салбий таъсир ўтказмоқда. Мораторийдан мақсад эса ўсимликнинг табиий популяцияси, такрор кўпайиши ва қайта тикланишини таъминлашдир.
3 йилга мўлжалланган мораторий даврида ёввойи ҳолда ўсувчи тожик каврагидан фойдаланганлик ҳолатлари аниқланганда қонуний чоралар кўрилади. Шунингдек, каврак ўсимлигининг Ўзбекистон Республикаси Қизил китобига киритилган ҳамда киритилмаган барча турларидан тегишли рухсатномасиз фойдаланиш (табиатдан ажратиб олиш, йиғиш, кесиш, зарар етказиш, нобуд қилиш) ва сотиш юзасидан қатъий назорат ўрнатилади.
Маълумот учун, каврак (Ферула) селдердошлар оиласига мансуб бўлиб, кўп йиллик ўт ўсимлик ҳисобланади. Унинг ер юзида 160 дан зиёд, Ўрта Осиё республикаларида 104 та, Ўзбекистонда эса 50 дан зиёд турлари учрайди. Кавракнинг елим-смоласи халқ табобатида томир тортишиши, ўпка сили, ўлат, захм, кўк йўтал, тиш оғриғи, асаб ва бошқа касалликларга қарши дори ҳамда қувват берувчи восита сифатида қўлланади.
Изоҳ (0)