Кремль яна 400 минг россияликни урушга “жимгина” сафарбар қилмоқчи — WP

Кремль Украинадаги урушга яна 400 минг аскарни жалб қилмоқчи, аммо жамоатчиликнинг ғазабидан қўрқади. Бу ҳақда АҚШ разведкасининг махфий ҳужжатларига таяниб, Washington Post хабар берди.

Пентагоннинг интернетга сиздирилган ҳужжатларидан бирига кўра, февраль ойи ўрталарида Россия президенти Владимир Путин ҳарбийларнинг 2023 йил давомида Украинадаги уруш учун 400 минг қўшимча аскарни “жимгина йиғиш” таклифини қўллаб-қувватлаган.

Бу маълумотлар “сигнал разведка ҳисоботи”га асосланган бўлиб, яъни у Россия ҳарбий амалдорларининг алоқаларини тинглаш йўли билан олинган.

Ғарб тадқиқотига кўра, Россия 2022 йилнинг февралида 150 мингга яқин аскар билан Украинага кенг кўламли босқинни бошлаган. Ўтган кузда “умумий сафарбарлик” пайтида 300 мингдан ортиқ киши урушга ёлланган ва яна 50 минг киши “Вагнер” таркибида жанг қилмоқда. 

Пентагоннинг интернетга сиздирилган махфий ҳужжатида Россия 189 500 дан 223 000 гача одамни йўқотгани, улардан 43 нафари ҳалок бўлгани келтирилган.

Қайд этилишича, ўтган йилнинг кузида қисман сафарбарлик жанговар ёшдаги эркакларнинг оммавий равишда мамлакатдан чиқиб кетишига сабаб бўлиб, меҳнат ресурсларини ҳам камайтирган. Шу сабабли губернаторларнинг чақирув кампанияларни ташкил этиши, Россия қамоқхоналаридаги эркакларни урушга ёллашда давом этиш режалаштирилаётгани айтилмоқда.