AQSH Ukraina armiyasiga Abrams tanklarini yetkazib berishni tezlashtirishi kerak, agar ular sentabrgacha Ukraina Qurolli kuchlari ixtiyoriga topshirilmasa, “juda kech” bo‘lishi mumkin, dedi senator Angus King AQSH Senati Qurolli kuchlar qo‘mitasidagi tinglovda.
Senator Kiyevda bu yil Rossiya armiyasiga qarshi turish uchun yetarlicha o‘t oсhish kuchlari bo‘lmasligidan xavotirda ekanini bildirdi va Abrams tanklarni hozirdanoq Polsha hududiga joylashtirishga chaqirdi, shunda may oyida Ukraina harbiylarini o‘qitish tugaganidan so‘ng, zudlik bilan tanklarni ularga topshirish imkoni bo‘ladi.
Boshqa kongressmenlarning ta’kidlashicha, Bayden Ukrainaga tanklarni yetkazib berishni tezlashtirishga qodir, ammo buning uchun kerakli harakatlarni qilmayapti. Senator Tom Kottonning fikricha, harbiy ta’minotni kechiktirish to‘g‘risida siyosiy qaror qabul qilingan.
AQSH Ukrainaga Abrams tanklarini va’da qilgan
2023-yil 25-yanvar kuni AQSH hukumati Abrams tanklarini Ukrainaga topshirishga qaror qildi, Pentagon bu jarayon bir yildan ko‘proq vaqtni olishi mumkinligini bildirdi. Shundan so‘ng AQSH harbiylari tanklarni zaxiralardan olish va yetkazib berishga tayyorlash uchun qayta tekshiruvdan o‘tkazish haqida hisobot berdi. Reuters xabariga ko‘ra, ular kuzda Ukraina armiyasiga topshirilishi mumkin. Amerika tanklarini yetkazib berishning sustligi bo‘yicha tanqidlar fonida Pentagon mojaroga yagona samarali yechim yo‘qligini taʼkidladi.
Ukraina hukumatining qarshi hujumi bahor yoki yozda amalga oshirilishi kutilmoqda. Newsweek ma’lumotlariga ko‘ra, hujum 30-aprelda boshlanishi mumkin. Shu bilan birga, Ukraina Oliy Radasi G‘arb texnikasi yetarli emasligi sabab hujum aprel oyidan noma’lum muddatga qoldirilganini ma’lum qilgan.
Izoh (0)