Сурхондарё вилоятидаги овчилик хўжалиги ҳудудида россиялик овчи Қизил китобга киритилган Марҳур эчкисини овлади. Табиат ресурслари вазирлиги ахборот хизмати ҳолат юзасидан муносабат билдирди.
Маълум қилинишича, ёввойи ҳайвонларни, жумладан, Қизил китобга киритилган ҳайвонларни овлаш учун 2022 йилги тасдиқланган квотага мувофиқ Россия фуқароси Сергей Мазуркевичга Марҳур эчкисини овлаш учун 23 ноябрь куни рухсатнома берилган.
Овчилик ҳудудий экология ва атроф-муҳитни муҳофаза қилиш бошқармалари инспекцияси назорати остида ов қилиш учун берилган рухсатнома рўйхатга олинган. Ов тугагач, вилоят экология инспекцияси вакили томонидан овланган ҳайвонга далолатнома тузилган.
Ушбу ҳайвонларни овлаш нархлари “Ов қилиш ва ов хўжалиги тўғрисида”ги Ўзбекистон Республикаси қонуни 1-иловасида белгиланган. Ўлжа олиш мақсадида ов қилишда, асосан, қонун билан тақиқланмаган қуроллардан (милтиқ карабинлари ва замонавий оптикалар)дан фойдаланилади.
Ўлжа олиш мақсадида овни ташкил этиш ва ўтказиш учун олинган маблағлар ёввойи ҳайвонлар популяциясини муҳофаза қилиш, биотехник тадбирларни ўтказиш ва ижтимоий аҳамиятга молик лойиҳаларни молиялаштириш, шу жумладан, ёввойи ҳайвонларнинг ноёб турларини кўпайтириш бўйича питомниклар қуриш, мустақил халқаро экспертларни жалб қилиш, ёввойи ҳайвонларни рўйхатга олиш учун ажратилади.
Изоҳ (0)