Итга инсоннинг дўсти сифатида қаралади. Унинг хўжайинига бўлган садоқати чексиз. Голливуд юлдузи Силвестр Сталлоне ўз мисолида инсон севимли уй ҳайвони учун кўп нарсага қодир эканини исботлади.
Голливуд актёри Силвестр Сталлоне 1971 йилда, яъни 25 ёшли йигит бўлган пайтида интилувчан лекин унчалик машҳур бўлмаган актёр эди. Ўша пайтда актёр театр ва телесериалларда кичик ролларни ижро этади, бироқ унча кўп маблағ топа олмайди. Интервьюларининг бирида Сталлоне ўшанда фақат бир жуфт шими ва тешик туфлиси борлигини айтган. Пайти келиб актёрнинг шахсий молиявий инқирози шу даражага етганки, у ҳаттоки тўйиб овқатланиши учун пул топа олмаган. Актёр эса музлаткични бирор нарса билан тўлдириш учун ўша пайтда ҳали кичкина ит бўлган Буткусни 40 долларга сотишга мажбур бўлган.
Бу қарорни қабул қилиш актёр учун қийин бўлди, чунки ит унинг қийин пайтларидаги содиқ дўстига айланган эди.
“У менинг кайфиятимга чидайдиган ва борлигимча яхши кўрган ягона тирик мавжудот эди”, — дейди Силвестер.
Бироқ актёр итини унута олмади. Сталлоненинг ҳаёти 1976 йилда чиқарилган ва унга узоқ кутилган муваффақиятни келтирган “Рокки” фильми сценарийсининг сотилиши билан ўзгарди. Актёр гонорарни олгач, тезда итини қайтариб олишга шошилди. Бироқ итнинг янги эгаси Буткус Силвестр учун нақадар азиз эканини билиб, унга ақл бовар қилмайдиган нарх — 15 минг доллар бериши кераклигини айтди.
Сталлоне ҳеч иккиланмасдан пул тўлади ва кейинчалик “ҳар бир сент бунга арзишини” айтди. “Рокки” фильми машҳур лойиҳага айланди ва уч марта “Оскар” мукофотини олди. Силвестр 1981 йилгача, яъни итининг ўлимигача ундан ажралмади.
Изоҳ (0)