Американинг Теннесси ва Пенсильвания штатларидаги отишмалар оқибатида олти киши ҳалок бўлиб, камида 28 киши жароҳатлар олди, деб ёзади «РБК».
Теннесси штатининг Чаттануга шаҳридаги отишма 5 июнь куни эрталаб содир бўлди. Маҳаллий вақт билан 03:00 атрофида (Тошкент вақти билан 12:00) бар яқинида ўт очилган. Шаҳар полицияси маълум қилишича, ҳужумчилар уч кишини ўлдириб, 17 кишини яралаган, бунинг устига, уч нафар жабрланувчи воқеа жойидан қочиб кетишга уринган, аммо уларни ўтиб кетаётган машиналар уриб юборган.
Маҳаллий полиция бошлиғи Селеста Мёрфи маълум қилишича, уч нафар қурбоннинг икки нафари ўқотар қуролдан олган жароҳатлардан ҳалок бўлган, учинчиси эса автомобиль уриб кетиши натижасидаги шикастланишлардан вафот этган. Айни пайтда жабрланганларнинг бир нечтаси оғир аҳволда.
Матбуот анжумани доирасида ҳуқуқ-тартибот органлари аниқлик киритишича, жабрланганлар орасида ёш бола ҳам бор. Полиция ҳужумни бир неча киши биргаликда амалга оширган, деб тахмин қилмоқда.
Шу куннинг ўзидаёқ АҚШнинг бошқа штати — Пенсильванияда ҳам отишма бошланди. Филаделфия шаҳридаги ҳужум ҳам бир неча киши томонидан уюштирилган. Ўқ товушларини эшитган патруллик қилаётган полициячилар воқеа жойига етиб келиб, уларга жавобан ўт очган ва қуролларини ташлашга мажбур қилган. Отишма оқибатида икки эркак ва бир аёл ҳалок бўлиб, 11 киши яраланган.
NBC аниқлик киритишича, отишма маҳаллий вақт билан 00:00 атрофида (Тошкент вақти билан 09:00) юз берган. Ҳужумчилар қўлга олинганича йўқ, уларнинг бундан мақсадлари аниқланмоқда. Ўқотарлар тўппончалар билан қуролланган бўлган.
Аввалроқ АҚШда ўтган бир ҳафта ичида тўртта отишма содир этилгани хабар берилганди. Сўнгги марта Оклахома штати Талса шаҳрида Майкл Льюис исмли эркак шаҳар тиббий маркази биносига бостириб кириб, аввалроқ ўзини операция қилган жарроҳни отиб ташлаганди.
1—3 июнь кунлари 2021 нафар америкалик орасида ўтказилган сўров натижаларига кўра, аҳолининг аксарияти (72 фоизи) етарлича саъй-ҳаракатлар билан оммавий отишмалар олдини олиш мумкин, деб ҳисоблайди. Айни вақтда, республикачилар фикрича, бундай воқеалар «эркин жамият»нинг ажралмас қисмидир ва унга кўникиш керак.
Мавзуга доир:
Изоҳ (0)