Жиззах ва Гулистон шаҳарларида ҳавони мониторинг қилувчи автоматик станциялар ўрнатилди, деб хабар беради “Замин” фонди ахборот хизмати.
Қайд этилишича, “Замин” фонди ва Гидрометеорология хизмати агентлигининг қўшма лойиҳаси доирасида Ўзбекистон ҳудудларида ўрнатиш учун мўлжалланган 6 та ҳавони мониторинг қилиш автоматик станцияси олиб келинган. Улардан иккитаси Жиззах ва Гулистонга етказилиб, ўрнатилган.
“Айни пайтда мутахассислар станцияларни созламоқда ва синов тариқасида ишга туширмоқда, шундан сўнг ҳавонинг ҳолати тўғрисидаги маълумотлар реал вақт режимида ‘Monitoring.meteo.uz’ платформасида тақдим этиб борилади”, — дейилади хабарда.
Станцияларни ишга туширишдан аввал “Ўзгидромет”нинг жойлардаги ходимлари учун ўрнатилаётган станцияларни созлаш ва улардан фойдаланиш бўйича амалий тренинглар ўтказилмоқда.
2022 йил сентябрда Халқаро мовий осмон учун тоза ҳаво куни арафасида “Замин” фонди томонидан БМТнинг Атроф-муҳитни муҳофаза қилиш дастури (UNEP), Ўзбекистон Гидрометеорология хизмати маркази ва Давлат экология қўмитаси кўмагида “Тоза ҳавонинг инсон ҳаёти сифати учун аҳамияти” мавзусида муҳокама ўтказилганди.
Ўшанда тадбир иштирокчилари ҳаво сифати бўйича меъёрларни қўллаш борасидаги халқаро тажриба билан танишган ҳамда мониторинг якунида ҳавони назорат қилиш чора-тадбирларини энг намунали халқаро амалиётга мувофиқ ҳолда биргаликда такомиллаштиришга келишиб олган эди.
Изоҳ (0)