The New York Times газетаси хабар беришича, АҚШнинг Украинадаги уруш, шунингдек, Яқин Шарқ ва Хитойга оид жами юзга яқин махфий ҳужжати интернетга “сиздирилган”.
Maxфий файллар Пентагонга тегишли бўлиб, улар орасида АҚШ ва унинг иттифоқчилари томонидан Киевга қарши ҳужумга тайёргарлик кўришда қандай ёрдам берилаётгани ҳақидаги маълумотлар бўлган. Ҳужжатларда Украинага қурол-яроғ етказиб бериш жадваллари, қўшинлар ва батальон кучлари фотосуратлари мавжуд эди, дейилади хабарда.
Пентагоннинг собиқ юқори мартабали мулозими Мик Мулройнинг айтишича, ҳужжатларнинг тарқалиши Украинанинг ҳарбий режасига тўсқинлик қилиши мумкин.
“Ошкор бўлган ҳужжатларнинг кўпчилиги қоғозларнинг фотосуратлари бўлгани сабабли бу Украина, АҚШ ва НАТОнинг саъй-ҳаракатларига зарар етказмоқчи бўлган одам томонидан атайлаб интернетга сиздирилганга ўхшайди”, — деган Мик Мулрой.
Таҳлилчиларнинг фикрича, бу каби маълумотлар ошкор бўлиши АҚШга катта зарар етказиши мумкин. Ҳужжатларнинг баъзилари нафақат махфий, балки бошқа давлатлар, жумладан, АҚШ иттифоқчиларига кўрсатиш учун ҳам мўлжалланмаган. Шу билан бирга, бундай файлларнинг интернетга чиқиши атай чалғитиш учун уюштирилган бўлиши ҳам мумкин.
NYT манбасига кўра, Пентагон ҳозирда вазиятни ўрганмоқда ва ҳужжатларнинг тарқалиши ортида ким турганини аниқлаш учун текширув бошлаган.
Оқ уй расмийлари ҳужжатларни ижтимоий тармоқлардан олиб ташлашга ҳаракат қилган, бироқ ҳозирча бунга эриша олмаган.
Ўз навбатида, Украина президентининг маслаҳатчиси Михаил Подоляк эълон қилинган маълумотлар фотошоп эканини, ҳақиқий режалар тез орада жанг майдонида пайдо бўлишини таъкидлади.
Изоҳ (0)