Президент томонидан “Маъмурий ислоҳотлар доирасида ёшлар сиёсати ва спорт соҳасида давлат бошқарувини самарали ташкил қилиш чора-тадбирлари тўғрисида”ги қарор имзоланди, деб хабар беради Norma.
Ҳужжат билан Ёшлар сиёсати ва спорт вазирлиги фаолиятининг 9 та устувор йўналиши тасдиқланмоқда. Шунингдек, Ёшлар сиёсати ва спорт вазирлиги ҳамда Ёшлар ишлари агентлининг хусусий секторга ўтказилаётган вазифалари рўйхати тасдиқланяпти.
Унга кўра, давлат органлари ва ташкилотларининг раҳбарлари ҳар йили 1 февралга қадар ўз тизимларида ёшларга оид давлат сиёсати соҳасида белгиланган вазифаларни амалга оширишга қаратилган йиллик “Ёшлар дастури”ни Ёшлар сиёсати ва спорт вазирлиги билан келишилган ҳолда тасдиқлайди.
2024 йил 1 январдан бошлаб давлат органлари ва ташкилотлари томонидан ёшларга оид давлат сиёсати соҳасида ўтказиладиган ёшлар фестиваллари, форум, лойиҳа, танловлар ва бошқа маданий-маърифий тадбирлар Ёшларга оид тадбирларнинг йиллик календарь режаси асосида амалга оширилиши йўлга қўйилади. Бунда тадбирлар ҳақида маълумот “Yoshlarportali.uz” ягона электрон платформасида эълон қилинади.
2024 йил 1 январга қадар спорт соҳасини рақамлаштириш бўйича 24 та йўналишдаги ахборот тизимларини ўз ичига олган “ERP Sport” ягона электрон бошқарув тизими ишга туширилади ҳамда УзАСБО дастуридаги маълумотлар билан интеграция қилинади.
Бунда жойларда Ёшлар сиёсати ва спорт вазирлиги маблағлари ҳисобидан барпо этиладиган спорт объектлари ва иншоотларининг камида 30 фоизи электрон тизим орқали ушбу ҳудудда яшовчи аҳоли томонидан овоз бериш йўли билан аниқланади.
Шу билан бирга, 2023 йил 1 июлдан бошлаб спортчи идентификация карталари учун тўловлар миқдори уч баробарга камайтирилади, улардан фойдаланиш муддати 5 йил этиб белгиланади.
2024 йил 1 мартдан бошлаб спорт турлари бўйича ўтказиладиган расмий мусобақаларда иштирок этиши учун спортчиларнинг мансублиги ва уларнинг малакасини идентификация карталари (ID-карта) орқали аниқлаш тартиби жорий этилади.
Шунингдек, спорт мусобақаларида ғолиб ва совриндор бўлган спортчилар ва уларни тайёрлаган мураббийларни рағбатлантириш учун маблағлар миқдори тасдиқланмоқда.
2023 йил 1 июлдан Ёшлар сиёсати ва спорт вазирлигининг стипендияси таъсис этиляпти, унинг миқдори меҳнатга ҳақ тўлаш энг кам миқдорининг 3 бараварини ташкил этади. Ушбу стипендия тайинланган спортчиларга ўзини ўзи банд қилиш ҳуқуқи берилади.
Олимпия ва Паралимпия ўйинларида ғолиб ва совриндор бўлган спортчиларга Президент Администрацияси ҳузуридаги Тиббиёт бош бошқармасига идоравий мансуб бўлган тиббиёт муассасаларида белгиланган тартибда умрбод бепул тиббий хизматдан фойдаланиш ҳуқуқи берилади.
Ҳужжат Қонунчилик ҳужжатлари миллий базасида эълон қилинган ва 8 апрелдан кучга кирган.
Эслатиб ўтамиз, 6 апрель куни Шавкат Мирзиёев ёшлар сиёсати ва спортни ривожлантириш бўйича таклифлар тақдимоти билан танишганди. Унда соҳа инфратузилмасини ривожлантириш учун Ўзбекистон футболини қўллаб-қувватлаш жамғармаси тузилиши маълум қилинган.
Изоҳ (0)