Пентагоннинг интернетга “сиздирилган” махфий разведка ҳужжатларидан маълум бўлишича, Миср президенти Абдулфаттоҳ ас-Сиси Россияга жўнатиш учун 40 000 тагача ракеталарни яширинча ишлаб чиқаришни режалаштирган. Бу ҳақда The Washington Post хабар бермоқда.
Discord платформасида эълон қилинган ҳужжатларга кўра, Мисрда Россияга ракета етказиб бериш февраль ойида муҳокама қилинган. Ракетадан ташқари артиллерия снарядлари ва порох етказиб бериш имконияти ҳам кўриб чиқилган.
WP сўровига изоҳ берар экан, Миср Ташқи ишлар вазирлиги вакили “мамлакат позицияси бошиданоқ (урушга) аралашмасликка асосланган”ини айтди.
“Биз ҳар икки томонни ҳарбий ҳаракатларни тўхтатиш ва музокаралар йўли билан сиёсий ечимга келишга чақиришда давом этамиз”, — деди амалдор.
Шу билан бирга, АҚШ ҳукуматининг исмини ошкор қилишни истамаган вакили айтишича, Мисрнинг бундай режалари амалга оширилгани бўйича ҳозирча бирор белги йўқ.
“Бунинг амалга ошганини кўрмадик”, — деди расмий.
WP Миср АҚШ билан ҳамкорликни кучайтириб келаётганини эслатди Хусусан, Қўшма Штатлар ўн йиллар давомида мамлакатга ҳар йили бир миллиард доллардан ортиқ ҳарбий ёрдам кўрсатиб келади.
“Миср бизнинг Яқин Шарқдаги энг азалий иттифоқчиларимиздан бири. Агар Сиси Россия учун Украинада қўлланилиши мумкин бўлган ракеталарни яширинча ишлаб чиқараётгани рост бўлса, муносабатларимизни жиддий қайта кўриб чиқишимиз керак”, — деди сенатор Крис Мерфи.
Ҳужжатларга ишонилса, ракета масаласида Сиси иштирокидаги муҳокама 1 февралда бўлиб ўтган. Ундан бир неча кун олдин АҚШ Давлат котиби Энтони Блинкен Қоҳирага ташриф буюриб, Миср президенти билан учрашган эди. Блинкеннинг ташрифидан сўнг дарҳол Миср ташқи ишлар вазири Самеҳ Шукри Россия раҳбарлари билан музокаралар ўтказиш учун Москвага келган.
Ғарб ОАВлари апрель ойи бошида ижтимоий тармоқларда пайдо бўлган Пентагон махфий ҳужжатларининг сиздирилиши ҳақида хабар бера бошлади. Эълон қилинган ҳужжатларда Қўшма Штатлар нафақат потенциал рақиблари, балки иттифоқчилари устидан ҳам жосуслик қилаётгани ҳақида даллилар, шунингдек, АҚШ ва НАТОнинг Украина Қуролли кучларини бўлажак қарши ҳужум олдидан қандай тартибда тайёрлаш режалари мавжуд.
Пентагон тармоққа ўта махфий маълумотлар тарқалиб кетганини тан олди. Ҳозирда бу ҳолат юзасидан текширув ўтказилмоқда.
Изоҳ (0)