Давлат хавфсизлиги хизмати ҳамда Иқтисодий жиноятларга қарши курашиш департаменти ходимлари томонидан ўтказилган тезкор тадбирлар давомида АҚШга юбориш билан боғлиқ фирибгарлик ҳолатларига чек қўйилди, деб хабар беради ЎзА.
Хусусан тезкор тадбирларнинг бирида Самарқанд шаҳрида яшовчи 33 ёшли шахс ўзининг танишлари ёрдамида, Гулистон шаҳрида истиқомат қилувчи фуқарони АҚШга юбориш эвазига 35 минг доллар талаб қилиб, олдиндан 10 минг АҚШ доллари олган вақтида ушланган. Аниқланишича, у муқаддам фирибгарлик жинояти учун судланган.
Самарқанд шаҳрида яшовчи 27 ёшли шахс ҳамшаҳари бўлган 45 ёшли аёлнинг ишончига кириб, 50 минг доллар эвазига у ва унинг 2013 йилда туғилган қизини Ўзбекистон—Европа Иттифоқи—Мексика—АҚШ йўналиши орқали Қўшма Штатларга юборишни ваъда қилган. У зарур бўладиган ҳужжатларни расмийлаштириш учун олдиндан 10 минг доллар олган вақтида ДХХ ва ички ишлар органлари ходимлари томонидан ушланган.
Бошқа бир ҳолатда эса Самарқанд шаҳрида яшовчи 49 ёшли аёл Булунғур туманида истиқомат қилувчи, 39 ёшли фуқаро ва унинг 37 ёшли қариндошини 24 минг доллар эвазига танишлари ёрдамида Канада давлатига ишга юборишни ваъда қилиб, олдиндан 4 минг доллар олган вақтида ушланган.
Ҳозирда барча ҳолатлар юзасидан жиноят ишлари қўзғатилиб, тергов ҳаракатлари олиб борилмоқда.
Тошкентда фуқарони 20 минг доллар эвазига АҚШга юбормоқчи бўлган талаба ушлангани, Самарқанд шаҳрида 64 нафар фуқарони АҚШга юборишини айтиб, уларнинг 4 миллиард сўмини ўзлаштирганларга суд ҳукми ўқилгани тўғрисида хабар берилганди.
Изоҳ (0)