Farg‘onada hokimlik balansidagi uyni 8,5 ming dollarga olib berishni va’da qilgan bo‘lim boshlig‘i ushlandi

Farg‘ona viloyatida o‘tkazilgan tezkor tadbirlar davomida noqonuniy valyuta aylanmasi va pora olish bilan bog‘liq holatga chek qo‘yildi. Bu haqda “Zamon” informatsion dasturida ma’lum qilindi.

Qayd etilishicha, departamentning Farg‘ona viloyati bo‘limi tomonidan tezkor tadbir o‘tkazilgan. Tadbirda valyuta ayirboshlash bilan shug‘ullanib kelgan fuqaro xaridorga 3,6 ming dollarni 41 million so‘mga sotganida ushlangan. Shuningdek, ushbu shaxsning yonidan jami 4,6 ming dollar ashyoviy dalil sifatida olingan.

Shu kabi yana bir holatda qonunga xilof ravishda valyuta ayirboshlash bilan shug‘ullanuvchi fuqaro xaridorga 3,6 ming dollarni 41 million so‘mga sotishga kelishib, shundan 2 850 dollarni bergan vaqtida qo‘lga olingan.

Bundan tashqari, departament hamda DXXning Quvasoy shahar bo‘limlari bilan hamkorligida tadbir o‘tkazilgan. Tadbirda shahar hokimligi qoshidagi xo‘jalik hisobidagi uy-joylarni ro‘yxatga olish, almashtirish va taqsimlash bo‘limi boshlig‘i ikki nafar fuqaroga 8,5 ming dollar evaziga hokimlik balansida bo‘lgan uylardan biriga egalik qilish huquqini beruvchi orderni rasmiylashtirish, keyinchalik uni xususiylashtirishni va’da qilgani aniqlangan. U “o‘z xizmati” evaziga oldinda 3,8 ming dollar olganida ashyoviy dalillar bilan ushlangan.

Hozirda ushbu holatlar yuzasidan Jinoyat kodeksining tegishli moddalari bilan jinoyati ishlari qo‘zg‘atilib, tergov harakatlari o‘tkazilmoqda.