Ўзбекистон ва Исроил фармацевтика ва бошқа бир қанча соҳаларда ҳамкорликни кенгайтиради. Бу ҳақда Инвестициялар, саноат ва савдо вазирлиги ахборот хизмати хабар берди.
Хабарга кўра, инвестициялар, саноат ва савдо вазирининг ўринбосари Ойбек Ҳамраев Исроил Давлатининг Ўзбекистон Республикасидаги Фавқулодда ва мухтор элчиси Зеҳавит Бен-Hillэл билан учрашди. Учрашувда 2022 йилда мамлакатлар ўртасидаги товар айирбошлаш ҳажми ўтган йилга нисбатан икки баробарга ошгани таъкидланди. Томонлар қўшма ишчи гуруҳ тузиш ва ўзаро савдо кўрсаткичларини ошириш бўйича зарур саъй-ҳаракатларни амалга оширишга келишиб олди.
Томонлар қўшма лойиҳаларни ҳаётга жорий қилиш бўйича муваффақиятли тажрибани инобатга олиб, фармацевтика, кимё, электротехника, тўқимачилик, қишлоқ хўжалиги ва озиқ-овқат саноати, энергетика, банк, молия, қурилиш, туризм, шунингдек, соғлиқни сақлаш ва сув хўжалиги соҳаларида ҳамкорликни кенгайтиришдан манфаатдор эканлигини билдирди.
Учрашув якунлари бўйича Инвестициялар, саноат ва савдо вазирлиги ҳамда Исроил ТИВ ҳузуридаги Халқаро ҳамкорлик агентлиги ўртасида имзоланган англашув меморандумида белгиланган вазифаларни амалга оширишни жадаллаштириш бўйича келишувга эришилди. Бу икки давлат ўртасидаги икки томонлама молиявий ва техник ҳамкорликни мустаҳкамлашга ёрдам беради.
Маълумот учун, 2018 йилдан буён Исроил капитали иштирокидаги корхоналар сони 3,5 баробар ошди. Самарқанд вилоятида тайёр трикотаж маҳсулотлари, Тошкент вилоятида омборхона, архив, чакана савдо расталари ва тиббий асбоб-ускуналар ишлаб чиқариш корхоналарини муваффақиятли амалга оширилган лойиҳалар қаторида санаш мумкин.
Изоҳ (0)