Хитой компанияси Ўзбекистонда шаҳар ва транспорт инфратузилмасини қуриш соҳаларида лойиҳаларни амалга оширишда иштирок этиши мумкин. Бу ҳақда Инвестиция, саноат ва савдо вазирлиги ахборот хизмати хабар берди.
Хабарга кўра, 4 март куни Инвестициялар, саноат ва савдо вазирлигида вазир ўринбосари Ойбек Хамраев ва China Construction компанияси директори ўринбосари Сян Шангмоу ўртасида учрашув бўлиб ўтди. Учрашувда Хитой компаниясининг Ўзбекистонда шаҳар ва транспорт инфратузилмасини қуриш соҳаларида лойиҳаларни амалга оширишда иштирок этиш истиқболлари муҳокама қилинди.
Қайд этилишича, Хитой томони ушбу йўналишларда инновацион ишланмалар ва илғор тажрибаларни жорий этган ҳолда лойиҳаларни биргаликда амалга оширишга қизиқишини билдирди. Ўз навбатида, Ўзбекистон томони Хитой компаниясининг мамлакатимиздаги сармоявий ташаббуслари ва келгуси фаолиятини қўллаб-қувватлашга тайёрлигини билдирди.
Учрашув якунлари бўйича томонлар қўшма лойиҳаларни ишлаб чиқиш доирасида ҳамкорликни давом эттириш юзасидан келишувга эришди.
Маълумот учун: CSCYeC Construction аnd Engineering Corporation 1982 йилда ташкил этилган бўлиб, дунёдаги энг йирик инвестисия ва қурилиш корпорациялари гуруҳи ҳисобланади ва Хитой ҳукуматига бевосита бўйсунади. 2021 йилда CSCYeC шартномаларининг умумий қиймати 450,5 миллиард долларга етди. Компания Fortune журналининг 2021 йилдаги рейтинги бўйича дунёнинг 500 та энг йирик компаниялари орасида 13-ўринни эгаллади.
Изоҳ (0)