"Барча конлар Россияга берилгани ҳақидаги маълумот нотўғри. Энергетика вазири ҳужжатларни бизга биттама-битта кўрсатди" — Камолиддин Раббимов

“Озодлик” Ўзбекистоннинг газ соҳасидаги келишувлари бўйича таниқли сиёсатшунос Камолиддин Раббимов билан уюштирган суҳбатда, Раббимов Ўзбекистоннинг барча конлари 35 йилга Россияга бериб юборилгани ҳақидаги иддаолар нотўғри маълумот эканини айтиб ўтди. 

"Биз икки вазир билан гаплашдик. Ўзбекистонда ишлаб турган жами конларнинг сони 294 та, шундан 176 таси қўшма корхона. Демак, аксарият конлар Ўзбекистоннинг ўз қўлида, уларга ҳеч қандай ташқи инвестор, ташқи давлат аралашмайди. 176 та кондан 13 таси "Лукойл" билан, 2 тагинаси “Газпром” билан — ҳаммаси бўлиб 15 тагина участка Россия билан бирга. Улардан биттагинаси М-25 — “Мустақиллик 25” 35 йилга берилган. Бошқа бирорта кон 35 йилга Россияга берилмаган. Биз савол бердик, вазирлар бизга жуда ҳам жиддий жавоб беришди, энди вазирлар алдамаса керак.

Бизга ҳужжатларни биттама-битта кўрсатишди. Икки вазир ҳам катта папкаларда ҳужжатлар билан келишди. Ўзлари сейфларидан очиб, ёпиқ контрактларни олиб келиб кўрсатишди.

Мен айтмоқчи бўлганим, одамлар “Озодлик”нинг эфиридан 35 йилга бутун Ўзбекистоннинг газ ва нефть ресурслари қўлдан кетди, деган хулосага келади. 294 та кондан икки эмас, уч эмас, фақат биттаси ҳақида гап кетяпти, холос. Агар мен ҳозир нотўғри гапирсам, бунга вазирлар жавоб бериши керак, халқни алдаган бўлади. Бу ерда ёки “Озодлик” томонидан хато ўтяпти, ёки вазирлар онгли равишда манипуляция қилаётган бўлади. Иккаласидан биттаси, бошқа гап йўқ бу ерда.

Вазирлар бизга ҳатто участкаларни ҳам кўрсатди, у ерга, уларнинг айтишича, Ўзбекистон бюджетидан бир тийин киритилмайди. Ерлар Ўзбекистонники. Унинг остидаги газ ёки нефть ҳам Ўзбекистонники. Уни инвесторларга, айниқса, хорижий инвесторларга — British Петролиум, Тотал ва бошқаларга таклиф қилган. Вазирлар айтяптики, бу  хорижий компаниялар бунақанги кичик ҳудудга, кичик ҳажмга ва кичик фоизга келмайди. 

Мен мутахассис эмасман, лекин тушунишга ҳаракат қилдим. Баъзиларида битта қобиқ бўлиб туради, битта қувур тиқсангиз чиқаверади. Баъзиларида қават-қават бўлади ва битта ҳудуддаги газга бир нечта жойдан қувур қазиш керак, шунақа жойлари бор. Мен тасаввур қиляпман, Ўзбекистондаги участкаларнинг ҳажми ҳар хил, лекин 35 йил фақат битта участка ҳақида гап кетяпти" - деди Камолиддин Раббимов.