Аввал хабар берилганидек, 2022 йилнинг 25 декабрь куни Корея Миллий Ассамблеяси томонидан Олмалиқ кон-металлургия комбинатига 15 млрд вон(12 млн АҚШ доллари атрофида) миқдоридаги грант ажратилиши бўйича қарор қабул қилинган эди.
Шу муносабат билан жорий йилнинг 8 февраль куни Корея технологияларни ривожлантириш институти (Korea Institute for Advancement Technology - KIAТ) вакиллари Олмалиқ кон-металлургия комбинатига ташриф буюришди.
ОКМК раҳбарияти ва меҳмонлар ўртасидаги учрашувда ўзаро манфаатли ҳамкорлик масалалари муҳокама этилди. Кореялик меҳмонлар томонидан институт фаолиятига оид, Ўзбекистон билан Корея давлати ўртасидаги ҳамкорлик муносабатлари бўйича тақдимот ҳам ўтказилди.
Олмалиқ кон-металлургия комбинати ва Корея технологияларни ривожлантириш институти (Korea Institute for Advancement Technology - KIAТ) ўртасида ODA (Official development assistnace) дастури бўйича 15 млрд Корея вонлик (эквивалент 12 млн АҚШ доллари) грант шартномаси имзоланди.
Мазкур грант доирасида Корея Республикаси томонидан Чирчиқ шаҳридаги ўзбек-корейс Нодир металлар ва қаттиқ қотишмалар Илмий технологик маркази таркибида саноат-тажриба цехи ташкил қилинади.
Грантнинг асосий мақсади, Ўзбекистон корхоналари нодир металларни қайта ишлаш ҳамда илмий ишланмаларни тижоратлаштириш учун зарур инфратузилмасини ташкил қилиш, юртимизда нодир металларни қайта ишлаш учун замонавий технологияларни трансферини амалга оширишдан иборат.
Шунингдек, юртимиздаги корпоратив ишчи кучи сонини ҳамда илмий тадқиқот қобилиятларини ошириш, Ўзбекистон ва Корея ўртасидаги шахсий сектор компаниялари бизнес имкониятларини кенгайтириш ҳам мақсад қилинган.
Лойиҳа 5 йилга мўлжалланган бўлиб, бюджети 15 млрд Корея вонни ташкил этади.
Лойиҳа давомида, марказга тижоратлаштиришга тайёр технологик ускуналар етказиб берилади. Корея Республикаси мутахассислари билан қўшма илмий тадқиқотлар олиб борилади. Корея Республикасининг нодир металлар ва мис саноати соҳасидаги етук экспертлари Ўзбекистонда фаолият олиб боради. Тизимли равишда марказнинг муҳандислари ва менежменти учун стажировка ва ўқитишлар ташкил қилинади.
Ташриф давомида меҳмонлар Чирчиқ шаҳридаги бирлашма қошидаги фаолият юритиб келаётган ўзбек-корейс илмий технологик марказ фаолияти ҳамда Қалмоққир ва Ёшлик-1 конларида, янги барпо этилаётган 3-Мис бойитиш фабрикасида ҳам бўлишди.
Реклама ҳуқуқи асосида.
Изоҳ (0)