Avval xabar berilganidek, 2022-yilning 25-dekabr kuni Koreya Milliy Assambleyasi tomonidan Olmaliq kon-metallurgiya kombinatiga 15 mlrd von(12 mln AQSH dollari atrofida) miqdoridagi grant ajratilishi boʻyicha qaror qabul qilingan edi.
Shu munosabat bilan joriy yilning 8-fevral kuni Koreya texnologiyalarni rivojlantirish instituti (Korea Institute for Advancement Technology - KIAT) vakillari Olmaliq kon-metallurgiya kombinatiga tashrif buyurishdi.
OKMK rahbariyati va mehmonlar oʻrtasidagi uchrashuvda oʻzaro manfaatli hamkorlik masalalari muhokama etildi. Koreyalik mehmonlar tomonidan institut faoliyatiga oid, Oʻzbekiston bilan Koreya davlati oʻrtasidagi hamkorlik munosabatlari boʻyicha taqdimot ham oʻtkazildi.
Olmaliq kon-metallurgiya kombinati va Koreya texnologiyalarni rivojlantirish instituti (Korea Institute for Advancement Technology - KIAT) oʻrtasida ODA (Official development assistnace) dasturi boʻyicha 15 mlrd Koreya vonlik (ekvivalent 12 mln AQSH dollari) grant shartnomasi imzolandi.
Mazkur grant doirasida Koreya Respublikasi tomonidan Chirchiq shahridagi oʻzbek-koreys Nodir metallar va qattiq qotishmalar Ilmiy texnologik markazi tarkibida sanoat-tajriba sexi tashkil qilinadi.
Grantning asosiy maqsadi, Oʻzbekiston korxonalari nodir metallarni qayta ishlash hamda ilmiy ishlanmalarni tijoratlashtirish uchun zarur infratuzilmasini tashkil qilish, yurtimizda nodir metallarni qayta ishlash uchun zamonaviy texnologiyalarni transferini amalga oshirishdan iborat.
Shuningdek, yurtimizdagi korporativ ishchi kuchi sonini hamda ilmiy tadqiqot qobiliyatlarini oshirish, Oʻzbekiston va Koreya oʻrtasidagi shaxsiy sektor kompaniyalari biznes imkoniyatlarini kengaytirish ham maqsad qilingan.
Loyiha 5 yilga moʻljallangan boʻlib, byudjeti 15 mlrd Koreya vonni tashkil etadi.
Loyiha davomida, markazga tijoratlashtirishga tayyor texnologik uskunalar yetkazib beriladi. Koreya Respublikasi mutaxassislari bilan qoʻshma ilmiy tadqiqotlar olib boriladi. Koreya Respublikasining nodir metallar va mis sanoati sohasidagi yetuk ekspertlari Oʻzbekistonda faoliyat olib boradi. Tizimli ravishda markazning muhandislari va menejmenti uchun stajirovka va oʻqitishlar tashkil qilinadi.
Tashrif davomida mehmonlar Chirchiq shahridagi birlashma qoshidagi faoliyat yuritib kelayotgan oʻzbek-koreys ilmiy texnologik markaz faoliyati hamda Qalmoqqir va Yoshlik-1 konlarida, yangi barpo etilayotgan 3-Mis boyitish fabrikasida ham boʻlishdi.
Reklama huquqi asosida.
Izoh (0)