Telegram жамоаси илованинг 2023 йилдаги биринчи янгиланишни тақдим қилди.
Профил расмини яратиш воситаси
Энди фойдаланувчилар исталган стикер ёки анимацияли эможини ҳисоблар, гуруҳлар ёки каналлар учун профил расмига тезда айлантириши мумкин. Исталган фойдаланувчи ҳатто Telegram Premium’га эга бўлмаса ҳам ушбу расмлар учун анимацияли ва махсус эможилардан фойдалана олади.
Шунингдек, Telegram’да контактларни таҳрирлаётганда улар учун профил расмларини белгилаш ёки таклиф қилиш мумкин.
Бутун чатларни таржима қилиш
Premium фойдаланувчилар энди юқоридаги Таржима панели ёрдамида бутун чатлар, гуруҳлар ва каналларни таржима қилиши мумкин. Параметрлар менюси уларга панелни беркитиш ва қайси тиллар таржима қилинишини бошқариш имконини беради.
Барча фойдаланувчилар алоҳида хабарларни танлаш ва “Таржима қилиш” тугмасини босиш орқали таржима қилиши мумкин.
Тармоқдан фойдаланиш
Энди Wi-Fi ва мобил интернет учун батафсил доиравий диаграммалар билан Telegram қанча трафик ишлатганини кўриш ва трафик режага мос келиши учун автоматик юклаб олиш созламаларини ўзгартириш мумкин.
Кирувчи медиани автоматик сақлаш
Созламаларда қурилма галереясига автоматик равишда сақланадиган чат турларини танлаш, шунингдек, сақланадиган медиа файллар ҳажми ва турини белгилаш мумкин. Бундан ташқари, фақат керакли расм ва видеолар сақланиши учун алоҳида чатлар учун истисно қўшса ҳам бўлади.
Медиа юбориш рухсатлари
Админлар гуруҳ аъзолари расмлар, видеолар, овозли ёки видео хабарлар каби 9 та турли медиа турини юборишга рухсат бериш ёки бермасликни танлаши мумкин. Фақат медиа юбориладиган гуруҳларни яратиш учун матнли хабарларни фаолсизлантириш имкони ҳам пайдо бўлди.
Энди фақат овозли хабарлар ёки тестларни юборишга рухсат берилган гуруҳ яратиш мумкин.
Йиллик Premium обунаси
Telegram Premium’нинг бир йиллик обунасига тўлов қилиш ва 40 фоиз чегирма билан эксклюзив функциялардан фойдаланиш мумкин.
Ботлар учун чатларни танлаш
Бот дастурчилари фойдаланувчиларга олдиндан белгиланган мезонларга мос келадиган гуруҳ, канал ёки одамларни танлашга ёрдам берадиган махсус тугмаларни қўшиши мумкин.
Масалан, ундан ботни фойдаланувчи админ бўлган ва мавзулар ёқилган гуруҳга тезда қўшиш учун фойдаланса бўлади.
Бот дастурчилари қўлланмада ва @BotNews каналида батафсил ахборот олиши мумкин.
Apple ва Google ID билан қайта ҳисобга кириш
Ҳисобидан чиққан фойдаланувчилар Apple ёки Google ID ёрдамида SMS кодни киритмасдан тезда қайта кириши мумкин. Агар 2 босқичли текширув паролини созлаган бўлсангиз, уни киритишингиз керак бўлади.
Янги махсус эможилар
Ҳеч бир янгиланиш Telegram рассомларидан махсус эможиларнинг 10 та янги тўпламисиз бўлмайди. Бу сафар гуруҳ ва профил расмлари учун махсус ишланган бир неча юзлаб белгилар киритилган.
Эможилар панелининг юқори қисмидаги янги тренддагилар бўлими орқали ушбу тўпламлардан бири билан танишиш ва қўшиш мумкин.
Изоҳ (0)