Ayni vaqtda prezident Shavkat Mirziyoyev Namangan shahrida biznes vakillari, tadbirkorlar bilan muloqot oʻtkazmoqda. Bu haqda “Daryo” muxbiri xabar berdi.
Prezident aytishicha, kelgusida sanoat va xizmat koʻrsatishni tiklash uchun, respublika boʻyicha kuniga 80 million kub metr gaz va 126 million kilo-vatt soat elektr yetkazib beriladi (hozir – 70 million kub metr gaz va 120 million kilovatt soat elektr berilmoqda).
Bir hafta ichida gaz quyish shaxobchalariga kunlik 5 million kub metr gaz yetkazib beriladi (hozir – 1 million kub metr).
Energetika vazirligiga tadbirkorlarga energiya resurslarini yetkazishni kunlik nazoratga olib, muammolarni joyida hal qilib borish topshirigʻi berildi.
“Bu borada yana bir masala – Andijon va Fargʻonada boʻlgan uchrashuvlarda koʻplab tadbirkorlar elektr ishlab chiqarishni oʻzi yoʻlga qoʻyish, kichik quyosh stansiyalarni va mikroGESlar qurishga tayyorligini bildirdi. Bunday tashabbusi bor Namangan tadbirkorlarini ham, albatta, qoʻllab-quvvatlaymiz”, — dedi prezident.
Shuningdek, qurilish va qurilish materiallari tarmoqlarini tezroq tiklash uchun, davlat investitsiya dasturidan 3 trln soʻmlik moliyalashtirish shu haftadan ochiladi.
Xususan, Namanganda infratuzilmani yaxshilashga bu yil 1,3 trillion soʻm yoʻnaltiriladi. (Investitsiya dasturiga – 515 milliard soʻm, Mahallalar infratuzilmasi dasturi – 480 milliard soʻm) Shuningdek, “Ochiq budjet” doirasida viloyatga 600 milliard soʻm ajratiladi.
“Bu choralar orqali, Namanganda birinchi chorakning oʻzida kamida 210 milliard soʻmlik qoʻshimcha qiymat yaratiladi”, — dedi davlat rahbari.
Izoh (0)